Saida Mirziyoyeva Qozog‘iston davlat maslahatchisi bilan uchrashuv o‘tkazdi

Saida Mirziyoyeva Qozog‘istonga tashrif doirasida davlat maslahatchisi Yerlan Karin bilan uchrashuv o‘tkazdi.

Ma’lum qilinishicha, 6-avgust kuni bo‘lib o‘tgan uchrashuv davomida ikki tomonlama, mintaqaviy va ko‘p tomonlama munosabatlarning dolzarb masalalari muhokama qilindi.

“Asosiy yo‘nalishlarda yaqindan muloqotni yo‘lga qo‘yish va mustahkamlash istiqbollari, jumladan, madaniy va xalq diplomatiyasi sohasida, shuningdek, axborot siyosati borasida hamkorlikdagi sa’y-harakatlarni muvofiqlashtirish yuzasidan fikr almashdik”, deydi Saida Mirziyoyeva.

5-avgust kuni Ostona shahrida Markaziy Osiyoning eng kuchli bilimdonlarini o‘zida jamlagan “Zakovat” intellektual harakatining Osiyo kubogi bo‘lib o‘tdi. O‘zbekiston prezidenti yordamchisi Saida Mirziyoyeva ham tadbirda ishtirok etish uchun Qozog‘istonga tashrif buyurdi. Shu kuni u Qozog‘iston prezidenti Qosim-Jo‘mart To‘qayev bilan uchrashdi. Uchrashuvda ikki davlat o‘rtasidagi ko‘p qirrali sheriklikni yanada rivojlantirishning dolzarb masalalari muhokama qilindi.