Falastin xalqi yana biroz sabr qilsa, azoblar tez orada yakunlanadi, deya Eron TIV ma’lum qildi.
Vazirlik bayonotiga ko‘ra, Isroilning AQSH hamda uning ittifoqchilari ko‘magida namoyon bo‘layotgan falastinliklarga nisbatan qattiqqo‘lligidan global norozilik kuchayib bormoqda.
“Isroil rejimining mintaqada va dunyoda nafas olish maydoni kundan kun toraymoqda, rejimga qarshi global norozilik kuchaymoqda, Isroil jamiyati va uning elitasi orasida umidsizlik chuqurlashib bormoqda”, deydi Eron TIV.
Bayonotda aytilishicha, sionistik rejimning AQSH va aksar G‘arb davlatlarining to‘g‘ridan to‘g‘ri va to‘liq qo‘llab-quvvatlashi bilan sodir bo‘layotgan vahshiyligining ortishi “bu rejimning parchalanish tahdidi oldida vahimaga tushganidan dalolatdir”.
“Falastinning iztirobli, qayg‘uli, ammo matonatli xalqiga ‘Ozgina sabr qilsak, tong otishi yaqin’, deb aytilishi kerak”, deyiladi hujjatda.
Axios portali manbalarga tayanib xabar berganidek, Isroil razvedka xizmatlari Eron yaqin bir necha kun ichida Isroilga zarba berishi mumkinligini taxmin qilmoqda.
“Isroil razvedkasining yangi bahosiga ko‘ra, Eron HAMAS siyosiy byurosi rahbari Ismoil Haniyaning o‘ldirilishi uchun qasos sifatida Isroilga to‘g‘ridan to‘g‘ri hujum qilishga qaror qildi va buni bir necha kun ichida, ehtimol 15-avgustga belgilangan G‘azodagi garovga olish bo‘yicha muzokaralar oldidan ham amalga oshirishi mumkin”, deya ta’kidlagan nashr.
Avvalroq AQSH, Qatar hamda Misr yetakchilari Isroil va HAMASni 15-avgust kuni G‘azoda o‘t ochishni to‘xtatish kelishuvi bo‘yicha muzokaralarni qayta boshlashga chaqirgan edi. Isroil bosh vaziri Binyamin Netanyaxuning idorasi muzokaralarda Isroil delegatsiyasi ishtirok etishini ma’lum qilgan, biroq HAMAS rasmiylari ishtirok etmasligini aytgan.
Izoh (0)