Ukraina Qurolli kuchlari Kursk viloyatidagi 28 ta aholi punktini nazoratga oldi. Bu haqda viloyat gubernatori vazifasini bajaruvchi Aleksey Smirnov Vladimir Putin bilan uchrashuvda ma’lum qildi.
“Kursk viloyati hududiga kirish chuqurligi 12 kilometrni, front bo‘ylab kengligi 40 kilometrni tashkil etadi”, deydi rasmiy.
Smirnovning so‘zlariga ko‘ra, Ukraina qo‘shinlari nazoratidagi aholi punktlarida 2 mingga yaqin odam bo‘lgan, ularning taqdiri nomaʼlum. Uning qo‘shimcha qilishicha, Ukraina armiyasining hujumi paytida Kursk viloyatining 12 tinch fuqarosi halok bo‘lgan, 121 kishi, shu jumladan, 10 nafar bola yaralangan. 12-avgust holatiga ko‘ra, viloyatning chegara hududlarini 121 mingga yaqin aholi tark etgan, jami 180 ming kishi evakuatsiya qilingan.
Ukraina Qurolli kuchlari 2024-yil 6-avgustdan buyon Kursk viloyatida harbiy operatsiya o‘tkazmoqda. Korenevskiy va Sudja tumanlarida faol janglar ketmoqda. 10-avgust kuni Belgorod, Bryansk va Kursk viloyatlarida aksilterror operatsiyasi rejimi joriy etilgan.
Ukraina xavfsizlik xizmati yuqori martabali mulozimining AFP nashriga ma’lum qilishicha, operatsiyada “minglab Ukraina harbiylari ishtirok etgan”.
Izoh (0)