Isroil kuchlari 8-avgust kuni G‘azoga bergan zarbalar oqibatida 40 nafar falastinlik halok bo‘lgan. Bu haqda Reuters nashri Yaqin Sharq manbalariga tayanib xabar berdi.
Manbada aytilishicha, payshanba kuni Isroil quruqlik va havo kuchlari anklav hududi bo‘ylab ommaviy hujumlar tashkil etgan. Ogohlantirmasdan berilgan zarbalar oqibatida tinch aholi orasida ko‘plab qurbonlar bo‘lgan.
Yaqin Sharqning qator nashrlari G‘azo markazida HAMAS bo‘linmalari Isroilga qarshi hujumga o‘tganini bildirgan. Isroil esa bunga qarshi turish uchun yalpi hujum eʼlon qilib, bino va inshootlarni ommaviy o‘qqa tutgan.
Isroil havo hujumlari dastlab G‘azo markazidagi al-Burayj lagerida kuzatilgan. Ushbu hududga raketalar kelib urilishi oqibatida kamida 15 kishi halok bo‘lgan. Yahudiy kuchlari, shuningdek, Nuseyrat lageriga ham zarba berib, 4 kishining o‘limiga sabab bo‘lgan.
Isroil mudofaa kuchlari al-Burayj hamda Nuseyrat lagerlarida “terrorchilar” to‘planganini iddao qilgan. 8-avgustdagi hujumlar lagerlar to‘liq tozalangunga qadar hali yana takrorlanishi xabar berilgan.
Xabarda qo‘shimcha qilinishicha, Isroil aviatsiyasi G‘azo va Xon Yunis shaharlariga ham hujumlar uyushtirgan. Bu ikki hujum oqibatida kamida 6 kishi halok bo‘lgan va 10 ga yaqin fuqarolar jarohatlangan.
G‘azo shahrining Tuffah mahallasidagi Abdulfattoh Hamuda va Az-Zahra maktablari ham hujumga uchragan. 15 kishi halok bo‘lib, 30 dan ortiq falastinlik jarohat olgan. Isroil zarba berilgan maktablarda HAMAS qo‘mondonlik punktlari joylashganini xabar bergan.
G‘azodagi HAMAS va “Islomiy jihod” tashkilotlarining qurolli qanotlari G‘azo bo‘ylab harakat qilayotgan Isroil kuchlariga tankka qarshi raketalar va minomyot bombalari bilan hujum qilganini maʼlum qilgan. Isroil kuchlari jiddiy zarbaga uchragani, askarlar orasida halok bo‘lgan va jarohatlanganlar borligi aytilgan.
Izoh (0)