2025-yil 15-iyul kuni o‘zbek milliy sport turi — Turon bo‘yicha Xalqaro federatsiya AQSHning Nyu-York shtati Departamenti tomonidan rasman ro‘yxatga olindi. Endilikda Xalqaro Turon federatsiyasi (International Turon Federation — ITF) o‘z faoliyatini xalqaro darajada amalga oshiradi.
Bugungi kunda dunyoda 200 dan ortiq davlat mavjud bo‘lsa-da, o‘z milliy sport turini xalqaro maydonga olib chiqqan mamlakatlar soni unchalik ko‘p emas. E’tiborli tomoni shundaki, o‘zbekistonliklar bu borada salmoqli yutuqlarga erishmoqda. Avval 1998-yil 6-sentyabrda Kurash sport turi rasman xalqaro maydonga chiqqan bo‘lsa, endilikda Turon sporti ham bu yo‘ldan bormoqda.
Xalqaro Turon federatsiyasining aynan Nyu-York shahrida tashkil etilishi bejiz emas. Nyu-York — dunyoning yirik siyosiy, moliyaviy va madaniy markazlaridan biri bo‘lib, Birlashgan Millatlar Tashkiloti, Butunjahon banki, Xalqaro valyuta jamg‘armasi kabi ko‘plab global institutlar aynan shu shaharda joylashgan. Federatsiya bosh qarorgohining aynan shu yerda tashkil etilishi Turon sportining xalqaro miqyosdagi rivoji uchun qulay imkoniyatlar yaratadi.
Yangi tashkil etilgan federatsiya oldida bir qator muhim vazifalar turibdi. Jumladan:
- Turon sporti qoidalarini xalqaro standartlarga mos ravishda qayta ko‘rib chiqish;
- Federatsiya boshqaruv tizimini shakllantirish;
- ITFning rasmiy ijtimoiy tarmoq sahifalarini ishga tushirish;
- Axborot va targ‘ibot ishlarini kuchaytirish;
- Yaqin kelajakda O‘zbekistonda Turon sporti bo‘yicha tarixdagi birinchi Jahon kubogi musobaqasini tashkil etish.
Federatsiya ushbu yo‘nalishlarda izchil va tizimli ishlarni boshlashga tayyor. Maqsad — Turon sporti orqali o‘zbek milliy merosini xalqaro miqyosda kengroq tanitishdir. Federatsiya bu yo‘lda hamkorlikka ochiq va qo‘llab-quvvatlashga tayyor bo‘lgan barcha tashabbuskorlarga doimo ochiqdir.
Izoh (0)