Polsha 2025-yilning hozirgi davriga qadar Tayvandan qariyb 6.5 million dollarga dron importini amalga oshirdi. Shu bilan mamlakat Tayvandan dron xarid qilish bo‘yicha Yevropada yetakchiga aylandi. Bu haqda RBC xabar berdi.
Ma’lum qilinishicha, 2025-yilning birinchi yarmida Tayvanning dron eksporti deyarli 750 foizga oshib, 11,89 million dollarni tashkil etgan. Bu eksportning yarmidan ko‘pi Polshaga to‘g‘ri kelmoqda.
“Polsha 6,48 million dollarlik xarid amalga oshirdi. Bu jami eksportning 54 foizini tashkil qiladi”, dedi Tayvan tashqi savdoni rivojlantirish kengashi (TAITRA) vakili.
Tayvandan dron xarid qilishda ikkinchi o‘rinni AQSH zabt etgan — Qo‘shma Shtatlar mamlakatdan 1,55 million dollarlik texnika sotib olgan. Bu 2024-yilga nisbatan 209 foiz ko‘p degani.
Yevropaning yana ikki davlati — Germaniya va Chexiya uchinchi va to‘rtinchi o‘rinlarni egallagan. Jumladan, Germaniya dronlarga 1,46 million dollar sarflab, 2024-yilga nisbatan 258 baravar ko‘p xaridni amalga oshirgan. Chexiyaning xaridlari esa 1,04 million dollarni tashkil etmoqda. Beshlikni Gongkong yakunlab, bu mamlakatga 1 million dollarlik dron yetkazib berilgan.
TAITRAning ta’kidlashicha, Yevropa Ittifoqi davlatlari “geosiyosiy keskinliklar” fonida mudofaa va kiberxavfsizlikni kuchaytirishga harakat qilib, Xitoydan mustaqil bo‘lgan yetkazib beruvchilarga yuzlanmoqda.
Yevropaga yuborilayotgan dronlar asosan harbiy maqsadlarda — chegaralarni muhofaza qilish, hududni nazorat qilish va dushman dronlariga qarshi kurashda ishlatilayotgani aytilgan. Shuningdek, ular qishloq xo‘jaligi, infratuzilma nazorati va shahar xavfsizligini ta’minlashda ham qo‘llanilmoqda.
Izoh (0)