Ukraina prezidenti Vladimir Zelenskiy AQSH ayrim havo mudofaasi raketalari va o‘q-dorilarni yetkazib berishni to‘xtatgani haqidagi xabarlardan so‘ng bayonot berdi.
Zelenskiyga ko‘ra, hozirda Daniya va boshqa hamkorlar bilan birgalikda qurol-yarog‘ va dronlar ishlab chiqarish bo‘yicha yangi kelishuvlar tayyorlanmoqda. Siyosatchi mudofaa va tashqi ishlar vazirlaridan “Qo‘shma Shtatlar bilan munosabatlar” bo‘yicha hisobot olganini aytgan.
Hozirda Ukraina va Qo‘shma Shtatlar o‘rtasidagi ishchi darajalarda mudofaa yordamini, shu jumladan, havo hujumidan mudofaa komponentini yetkazib berish bo‘yicha barcha tafsilotlar aniqlanmoqda. Qanday bo‘lmasin, biz odamlarimizni himoya qilishimiz shart, degan Zelenskiy.
AQSH o‘z zaxiralari kamaygani bois Ukrainaga baʼzi qurol-yarog‘lar yetkazib berishni to‘xtatgan. Gap Patirot tizimi uchun PAC-3 raketalari, HIMARS tizimi o‘q-dorilari, FIM-92 Stinger portativ havo mudofaa tizimlari, AIM-7 Sparrow raketalari hamda 155 mm kalibrli artilleriya snaryadlari haqida bormoqda.
Ukraina prezidenti ofisi rahbari maslahatchisi Mixail Podolyak Qo‘shma Shtatlardan qurol-yarog‘ yetkazib berishni to‘xtatish haqidagi bayonotni rad etgandi.
Bugungi kunda yetkazib berishlar davom etmoqda. Raketaga qarshi vositalarni, ayniqsa, Ukrainadagi tinch aholini aniq va keng miqyosda himoya qilayotgan Patriot tizimlarini yetkazib berishni to‘xtatish g‘alati va g‘ayriinsoniy ko‘rinardi, degan Podolyak.
Oq uy AQSH o‘z harbiy zaxiralari darajasining pastligi sababli Ukrainaga ayrim turdagi qurollarni yetkazib berishni to‘xtatayotgani haqida xabar bergan edi. Bu qaror AQSH Mudofaa vazirligining boshqa mamlakatlarga ko‘rsatilayotgan harbiy yordamni qayta ko‘rib chiqishi bilan bog‘liq.
Izoh (0)