Fransiyaning “PSJ” klubi yozgi transfer oynasida yirik xarid amalga oshirishi mumkin. Parijliklar “Barselona” yarim himoyachisi Gavi transferi ustida jiddiy ish olib bormoqda. Klub futbolchi uchun 80 million yevro miqdorida taklif tayyorlamoqda. Bu haqda Fichajes nashri xabar berdi.
Manbaga ko‘ra, “PSJ” bosh murabbiyi Luis Enrikening shaxsan o‘zi Gavini Parijga olib kelishni istamoqda. U ilgari Gaviga Ispaniya terma jamoasida murabbiylik qilgan va endi uni Parijdagi yangi loyihasining muhim qismi sifatida ko‘rmoqda.
Gavi murabbiyning o‘yin falsafasiga to‘liq mos keladi. Agar u “PSJ”ga o‘tsa, jamoaning markaziy chizig‘ida asosiy rolni bajarishi kutilmoqda. U Fabian Ruisning o‘rnini bosuvchi futbolchi sifatida ko‘rilmoqda va Joau Neves hamda Vitinya kabi yarim himoyachilar bilan ajoyib tandеm hosil qilishi mumkin.
“Barselona” bu transfer ehtimolini rad etmayapti. Garchi Gavi klub bilan 2030-yilgacha amal qiladigan shartnomaga ega bo‘lsa-da, moliyaviy muammolar tufayli “ko‘k-anorranglilar” uni sotishga majbur bo‘lishi mumkin.
Shuningdek, “Barselona” yarim himoya chizig‘ida kuchli raqobat mavjud — Frenki de Yong, Pedri, Fermin Lopes, Mark Kasado va Dani Olmo kabi futbolchilar asosiy tarkib uchun kurashmoqda. Bu esa Gavining o‘yin amaliyotiga salbiy ta’sir ko‘rsatishi mumkin.
Ma’lumot uchun, Gavi o‘tgan mavsum “Barselona” safida jami 42 ta o‘yinda maydonga tushib, 3 ta gol va 3 ta assist muallifi bo‘lgan. Transfermarkt portali futbolchining qiymatini 60 million yevroga baholagan.
Izoh (0)