Abu-Dabida o‘tkazilgan UFC on ABC 9 turniridan so‘ng MMAMania.com sharhlovchisi Adam Gillen ayrim jangchilarning keyingi raqiblari borasida o‘z takliflarini bildirdi. Uning fikricha, eng yengil vazn toifasida g‘alaba qozongan qozog‘istonlik Asu Almabayev navbatdagi jangini o‘zbekistonlik Ramazon Temirovga qarshi o‘tkazishi kerak. Bu haqda Sports.kz xabar berdi.
Asu navbatdagi jangini Ramazon Temirovga qarshi o‘tkazishi lozim. Aslida, bu turnirda uning raqibi Ramazon Temirov bo‘lishi kerak edi, biroq Temirov jang arafasida doping-testdan o‘tolmadi. Men hali ham bu jang tashkil etilishini istayman. Sababi, Temirov taqiqlangan moddani bilmagan holda qabul qilgan. Bunday holatlar har doim bahs-munozaralarga sabab bo‘ladi. Uning qancha muddatga chetlashtirilishi noma’lum, lekin bu jangni baribir kelajakda ko‘rishni xohlayman, — deydi Adam Gillen.
Hozircha UFC tashkiloti Almabayevning keyingi raqibini rasman e’lon qilgani yo‘q. Ramazon Temirov atrofidagi vaziyat esa mutasaddi tashkilotlar tomonidan ko‘rib chiqilmoqda.
Ma’lumot uchun, Abu-Dabidagi turnirda Asu Almabayev Ramazon Temirovga qarshi oktagonga chiqishi kerak edi. Ammo jang arafasida o‘zbekistonlik sportchida doping aniqlandi. Ma’lum bo‘lishicha, Temirovning Tailanddagi mashg‘ulotlari vaqtida infeksion yaralar paydo bo‘lgan. Shundan keyin u dori ichgan, ammo tavsiya etilgan dorida taqiqlangan modda bo‘lgani uchun doping testining javobi ijobiy chiqqan.
Shundan so‘ng UFC on ABC 9 turnirida Almabayevga perulik Xose Ochoa raqiblik qildi va uch raund davom etgan jangda hakamlarning bir ovozdan chiqargan qarori bilan qozog‘istonlik sportchi g‘alaba qozondi.
Izoh (0)