Joriy yil yarmida telefon importi bir yil avvalgidan 273 mingtaga qisqardi. Bu haqdagi maʼlumotlar Bojxona qo‘mitasi saytida keltirilgan.
2025-yil I yarmida O‘zbekistonga umumiy qiymati 194,4 mln dollarlik 1,87 mln dona telefon import qilindi. Taqqoslash uchun, 2024-yil mos davrida qiymati 200,9 mln dollarlik 2,15 mln dona uyali aloqa vositasi olib kelingan.
2023-yilning dastlabki olti oyida 129,6 mln dollarlik 1,87 mln dona (joriy ko‘rsatkich bilan teng) telefon xorijdan xarid qilingan.
“Telefonlarni noqonuniy yo‘llar bilan mamlakatga olib kirishga urinishlar ham yo‘q emas. 2025-yilning o‘tgan davrida bojxona organlari tomonidan qiymati 16,4 mlrd so‘mlik 44 ming donadan ziyod telefonlarni noqonuniy olib kirishga urinishlar oldi olindi”, deya maʼlum qildi Bojxona qo‘mitasi.
Statistika qo‘mitasi maʼlumotlariga ko‘ra, O‘zbekistonga eng ko‘p telefon importi Xitoydan amalga oshirilmoqda. Masalan, 2025-yil yanvar-may oylarida import qilingan 1,56 mln telefondan 1,2 mln donasi Xitoydan keltirilgan. Yana 304,5 mingtasi Vyetnamdan, 47,3 mingtasi BAAdan import qilingan.
Izoh (0)