Prezidentning tadbirkorlar bilan ochiq muloqotiga tayyorgarlik ko‘rish doirasida hunarmandchilik sohasida mavjud muammolar va ularning yechimi bo‘yicha takliflarni shakllantirish maqsadida davra suhbati bo‘lib o‘tdi.
Uchrashuvda Toshkentning Yashnobod tumanida tikuvchilik faoliyati bilan shug‘ullanuvchi Dilnoza Rasulova o‘z mahsulotlarini Amerika va Yevropadagi marketpleyslarga joylash, shuningdek, soliq tizimi bilan kuzatiladigan muammo xususida fikr bildirdi.
Menga ikki hafta yoki bir oy avval telefon qilishdi. “Amerika va Yevropadagi marketpleyslarga mahsulotlaringizni joylab beramiz. Hunarmand sizlarga 8,5 mln so‘m subsidiya beradi, sizlar bizlarga uni o‘tkazib berasizlar, biz esa joylab beramiz”, deyishdi. Keyin nima bo‘lishini so‘rasak, yana shuni aytishdi, “keyin ham 8,5 mln to‘layverasizlar, biz joylab boraveramiz”, deb. Nimaga shu narsani hunarmandlarning o‘zi qilmaydi? Nimaga biz har doim katta summa to‘lashimiz kerak? Qurbimiz yetmaydi, deydi u.
Hunarmandning aytishicha, u turli ko‘rgazmalarda qatnashgan.
Menga ham “narsalaring zo‘r, turistlar oladigan ekan”, deyishdi. Lekin men turistlar boradigan emas, o‘zbeklar boradigan, tomosha qilib ketiladigan joyga bordim. Chet elga chiqishga qurbim yetmaydi. O‘sha yerda surishtirdim, “mayli, amallab chiqaman, qancha pul ketadi”, dedim. 3-4 ming dollar ketishini aytishdi. “Borsang borib, sota olsang sotasan. Ayrimlar borib sotib kelyapti. Sotolmasang, yana bagajga pul to‘lab qaytarib olib kelasan”, deyishdi. Men qo‘rqdim. Oshib-toshib yotganida qilib ko‘rardim havas uchun. Mening qurbim yetmaydi, grantlarga biz borolmaymiz, deydi u.
Dilnoza Rasulova masʼullardan mahsulotlarini marketpleyslarga joylab berish masalasini so‘radi. Unga ko‘ra, to‘lanadigan summani subsidiya qilish lozim.
“Qolganini biz to‘laylik. Shu bo‘yicha yordam beringlar. 8,5 mln emas faqat”, deydi hunarmand.
Qo‘shimcha qilinishicha, har yili hunarmandlarning soliq bilan muammosi bo‘ladi.
Mening hozir qarzim yo‘q, lekin mashinam, uyim taqiqda turibdi. MIBdan menga har kuni turli xabarnomalar keladi. Hamma narsa onlayn bo‘lgan zamonda hunarmand bo‘lib yakka tartibdagi tadbirkor chiqmayapti. Nimaga meni MIB tiqib qo‘yyapti, taqiq bo‘lib turibdi. Har yili gapiraverib charchadik”, deydi Dilnoza Rasulova.
Yana bir hunarmand — shahrixonlik Muzaffar Umarovning aytishicha, Hunarmandlar uyushmasining guvohnomasi nusxasi soliq idoralariga olib borilsa, qabul qilinmaydi.
Mening taklifim, xorijdan xaridorimiz bor. Ekspert muammosi mavjud. Misol uchun, bugungi kunda faqat Rossiyaga jo‘nata olamiz. Avval Rossiyadan boshqa davlatga chiqarar edik, hozir Yevropalarga yetkazib berish qiyinlashib ketdi”, deydi hunarmand.
Avvalroq elektrotexnika va avtomobilsozlik sohalaridagi tadbirkorlar bilan bo‘lgan davra suhbatida Jizzax akkumulyator zavodining texnik direktori Shuhrat Umarov xorijdan O‘zbekistonga kirib kelayotgan akkumulyatorlar uchun utilizatsiya yig‘imini joriy qilishni taklif qilgan edi.
Shuningdek, ADM Jizzakh elektromobillar importi uchun bojlarni qaytarishni taklif qilgandi.
Izoh (0)