Namangan viloyat sudining apellyatsiya instansiyasi sudlanuvchi G‘.S.ga nisbatan chiqarilgan hukmni o‘zgartirib, uni sud zalidan ozodlikka chiqardi. “Daryo”ning viloyat sudidagi manbasiga ko‘ra, sudlanuvchi Pop tumani hokimining o‘g‘li bo‘ladi.
Sud hujjatida qayd etilishicha, sudlanuvchi G‘.S. o‘zi rahbar bo‘lgan Uychi tumanidagi “Jiydakapa baraka chorva” fermer xo‘jaligiga qarashli chorvachilik kompleksi va sutni qayta ishlash sexini elektr tarmog‘iga o‘zboshimchalik bilan ulab, elektr energiyasini yashirin ravishda talon-toroj qilganlikda ayblangan. Zarar miqdori 200 mln 326 500 so‘mni tashkil qiladi.
Sudlanuvchi jinoyat ishlari bo‘yicha Uychi tuman sudi hukmiga ko‘ra, JKning 169-moddasi (o‘g‘rilik) 4-qismi “a” bandida (juda qo‘p miqdorda) nazarda tutilgan qilmishni sodir etganlikda aybdor deb topib, unga nisbatan ikki yarim yil muddatga ozodlikdan mahrum qilish jazosi tayinlagan edi.
Jinoyat kodeksining 169-moddasi 4-qismining “a” bandida nazarda tutilgan jinoyat uchun 8 yildan 15 yilgacha ozodlikdan mahrum qilish jazosi belgilangan.
Ushbu jinoyat oqibatida yetkazilgan zararning qoplanishi ozodlikdan mahrum qilish bilan bog‘liq bo‘lmagan jazo tayinlanmasligiga asos bo‘lishi qonunchilikda nazarda tutilmagan.
Mazkur holat bo‘yicha tegishli organlar, xususan, Sudyalar oliy kengashi va Oliy suddan rasmiy izoh berilishini kutamiz.
Izoh (0)