Наманган вилоят судининг апелляция инстанцияси судланувчи Ғ.С.га нисбатан чиқарилган ҳукмни ўзгартириб, уни суд залидан озодликка чиқарди. “Дарё”нинг вилоят судидаги манбасига кўра, судланувчи Поп тумани ҳокимининг ўғли бўлади.
Суд ҳужжатида қайд этилишича, судланувчи Ғ.С. ўзи раҳбар бўлган Уйчи туманидаги “Жийдакапа барака чорва” фермер хўжалигига қарашли чорвачилик комплекси ва сутни қайта ишлаш цехини электр тармоғига ўзбошимчалик билан улаб, электр энергиясини яширин равишда талон-торож қилганликда айбланган. Зарар миқдори 200.326.500 сўмни ташкил қилади.
![](/static/2024/08/23/sud-Te1poXi0.jpg)
Судланувчи жиноят ишлари бўйича Уйчи туман суди ҳукмига кўра, ЖКнинг 169-моддаси (ўғрилик) 4-қисми “а” бандида (жуда қўп миқдорда) назарда тутилган қилмишни содир этганликда айбдор деб топиб, унга нисбатан икки ярим йил муддатга озодликдан маҳрум қилиш жазоси тайинлаган эди.
Жиноят кодексининг 169-моддаси 4-қисмининг “а” бандида назарда тутилган жиноят учун 8 йилдан 15 йилгача озодликдан маҳрум қилиш жазоси белгиланган.
Ушбу жиноят оқибатида етказилган зарарнинг қопланиши озодликдан маҳрум қилиш билан боғлиқ жазо тайинланмаслигига асос бўлиши қонунчиликда назарда тутилмаган.
Мазкур ҳолат бўйича тегишли органлар, хусусан, Судьялар олий кенгаши ва Олий суддан расмий изоҳ берилишини кутамиз.
Изоҳ (0)