Ukraina joriy yoz faslidan boshlab harbiy texnologiyalarni eksport qilish bo‘yicha dastlabki shartnomalarni imzolaydi. Ular orasida mamlakat qurollarini hamkorlikda ishlab chiqarish varianti ham bor. Bu haqda prezident Zelenskiy jurnalistlar bilan uchrashuvda ma’lum qildi.
Biz “Ukraina bilan qurish” dasturini ishga tushirdik. Shu yozda Yevropa mamlakatlari, ehtimol, nafaqat Yevropada, balki bizga yordam berayotgan, uchuvchisiz uchish qurilmalari ishlab chiqarishni moliyalashtirayotgan va Ukrainada raketalar ishlab chiqarishga hissa qo‘shayotgan mamlakatlarda korxonalar tashkil etish orqali texnologiyalarimizni xorijga eksport qilishni boshlash bo‘yicha tegishli kelishuvlarni imzolaymiz, degan ukrainaliklar yetakchisi.
Zelenskiyning so‘zlariga ko‘ra, Kiyev janglarda sinovdan o‘tgan tegishli texnologiyalarni taqdim etadi. Buning evaziga hamkor davlatlar nafaqat o‘zlari, balki Ukraina uchun ham qurol ishlab chiqaradi.
“Gap harbiy texnologiyalar, xususan, har xil turdagi dronlar, raketalar va, ehtimol, artilleriya tizimlari haqida. Bizda allaqachon kelishuvlar mavjud”, deya qo‘shimcha qilgan Zelenskiy.
U, shuningdek, mazkur texnologiyalar Rossiya tasarrufiga o‘tmasligi uchun Moskva bilan yaqin aloqadagi davlatlar hamkorlar ro‘yxatiga kiritilmasligini aytdi.
Ukraina harbiy sanoati
To‘liq miqyosli urush boshlanganidan beri Ukraina mahalliy qurol ishlab imkoniyatlarini sezilarli darajada oshirdi. Bu, ayniqsa, uchuvchisiz uchish qurilmalari hamda artilleriya snaryadlari ishlab chiqarishda yaqqol ko‘zga tashlandi.
Ukrainaning qurol-aslahaga bo‘lgan ehtiyojlarini qondira olmagan ittifoqchilar mamlakatni “Daniya formati” asosida qo‘llab-quvvatlay boshladi. Unga binoan hukumatlar Kiyevni qurol o‘rniga mahalliy harbiy sanoat uchun investitsiya bilan ta’minlay boshladi.
Izoh (0)