Misr hukumati tomonidan taqdim etilgan C gepatitiga qarshi dori vositalarining navbatdagi partiyasi O‘zbekistonga yetib keldi. Bu haqda “Dunyo” AA xabar berdi.
Maʼlum qilinishicha, Misr tomoni umumiy qiymati 114 ming 829 dollar bo‘lgan 28 dona qutida 7440 dona C gepatitiga qarshi beg‘araz “Sofosbuvir-400mg” dori vositasining 2025-yildagi ikkinchi partiyasini taqdim etdi.
7-iyun kuni dori vositalar Sharm ash-Shayxdan Toshkentga yetkazib berilgan. Ushbu dori vositalari SSV huzuridagi Virusologiya ilmiy-tekshirish instituti tomonidan bemorlarga taqsimlanadi.
O‘zbekiston elchixonasi maʼlumotiga ko‘ra, 2023-2024-yillarda Misr hukumati tomonidan O‘zbekistonga C gepatitiga qarshi kurashish uchun umumiy vazni 12,4 tonna bo‘lgan “Daklatasvir” va “Sofosbuvir” dori vositalari 27 partiyada insonparvarlik ko‘magi sifatida berilgan.
Mazkur dori vositalarining umumiy qiymati 1,4 million dollarga teng.
Mutaxassislar hisob-kitobiga ko‘ra, bir nafar bemorning 3 oylik to‘liq davolash kursi uchun 3 qadoq “Daklatasvir” va 3 qadoq “Sofosbuvir” kerak bo‘ladi.
Izoh (0)