Dunyodagi eng katta A23a aysbergi uzoq muddat sayozlikda turganidan so‘ng Janubiy okean suvlari bo‘ylab harakatlanishni boshladi.
Uning o‘lchami London shahridan ikki-uch barobar katta. Aysberg iyun oyi boshida 60 kilometr sharqqa siljigan bo‘lib, hozirda Antarktidaning kimsasiz Annenkov orolidan atigi 74 kilometr uzoqlikda joylashgan. Olimlarning aytishicha, muz giganti endi okean oqimlari va shamollarning yo‘nalishiga bog‘liq holda harakatlanadi.
May oyida A23a Buyuk Britaniyaga qarashli Janubiy Georgiya oroli yaqinidagi sayozlikda tiqilib qolgan edi. Bu orol millionlab pingvin va tyulenlarning yashash hududi hisoblanadi. Shu davr ichida aysberg o‘z maydonining taxminan 7 foizini yo‘qotgan. Biroq hanuzgacha 2730 kvadrat kilometrlik ulkan hajmi bilan e’tiborni tortmoqda. Bu deyarli yirik bir shahar hududiga teng.
Aysberg ajralib chiqqanidan beri umumiy maydonining 35 foizini yo‘qotgan. A23a — 1986-yilda Filxner muzligidan ajralgan bo‘lib, dastlabki maydoni 4170 kvadrat kilometrni tashkil etgan. 2024-yil avgust holatiga ko‘ra, u dunyodagi eng katta aysberg bo‘lib, eng qadimiy muz parchalari ro‘yxatiga ham kiradi.
A23a 30 yildan ortiq vaqt davomida Ueddell dengizining markaziy qismida harakatsiz holatda bo‘lgan. So‘ngra u to‘satdan Antarktida qirg‘oqlari bo‘ylab harakatlana boshlagan. 2024-yil davomida u taxminan 1400 kilometr masofani bosib o‘tgan. Keyin shimolga qarab siljib, 2025-yil yanvar o‘rtalarida Janubiy Georgiya oroliga yaqinlashgan. Mart oyida esa oroldan 80 kilometr uzoqlikda yana sayozlikka o‘tirgan va may oxirigacha shu joyda qolgan.
Izoh (0)