Дунёдаги энг катта А23а айсберги узоқ муддат саёзликда турганидан сўнг Жанубий океан сувлари бўйлаб ҳаракатланишни бошлади.
Унинг ўлчами Лондон шаҳридан икки-уч баробар катта. Айсберг июнь ойи бошида 60 километр шарққа силжиган бўлиб, ҳозирда Антарктиданинг кимсасиз Анненков оролидан атиги 74 километр узоқликда жойлашган. Олимларнинг айтишича, муз гиганти энди океан оқимлари ва шамолларнинг йўналишига боғлиқ ҳолда ҳаракатланади.
Май ойида А23а Буюк Британияга қарашли Жанубий Георгия ороли яқинидаги саёзликда тиқилиб қолган эди. Бу орол миллионлаб пингвин ва тюленларнинг яшаш ҳудуди ҳисобланади. Шу давр ичида айсберг ўз майдонининг тахминан 7 фоизини йўқотган. Бироқ ҳанузгача 2730 квадрат километрлик улкан ҳажми билан эътиборни тортмоқда. Бу деярли йирик бир шаҳар ҳудудига тенг.
Айсберг ажралиб чиққанидан бери умумий майдонининг 35 фоизини йўқотган. А23а — 1986 йилда Филхнер музлигидан ажралган бўлиб, дастлабки майдони 4170 квадрат километрни ташкил этган. 2024 йил август ҳолатига кўра, у дунёдаги энг катта айсберг бўлиб, энг қадимий муз парчалари рўйхатига ҳам киради.
А23а 30 йилдан ортиқ вақт давомида Уэдделл денгизининг марказий қисмида ҳаракатсиз ҳолатда бўлган. Сўнгра у тўсатдан Антарктида қирғоқлари бўйлаб ҳаракатлана бошлаган. 2024 йил давомида у тахминан 1400 километр масофани босиб ўтган. Кейин шимолга қараб силжиб, 2025 йил январь ўрталарида Жанубий Георгия оролига яқинлашган. Март ойида эса оролдан 80 километр узоқликда яна саёзликка ўтирган ва май охиригача шу жойда қолган.
Изоҳ (0)