AQSHning Eron yadroviy obyektlariga bergan zarbasi oqibatida neft narxi keskin oshib ketdi. Bu haqda The Guardian xabar berdi.
Neft narxi so‘nggi marta yanvar oyida keskin oshgan edi. Brent nefti fyucherslari 23-iyun holatiga ko‘ra, bir barrel uchun 1,52 dollarga yoki 1,97 foizga oshib, 78,53 dollarni tashkil etmoqda. AQSHning West Texas Intermediate nefti esa 1,51 dollarga yoki 2,04 foizga ko‘tarilib, 75,35 dollarga baholanmoqda.
Mutaxasislar Eronning Hormuz bo‘g‘ozini yopishi haqidagi tahdidlari sabab narxlar yanada oshishini bashorat qilgan. Ushbu bo‘g‘ozdan jahon xomashyo ta’minotining taxminan beshdan bir qismi o‘tadi.
“Hozirgi geosiyosiy keskinlashuv neft narxlari oshishiga va potensial ravishda 100 dollarga chiqishiga sabab bo‘ldi. Endilikda, bir barrel uchun 120 dollar borgan sari haqiqatga yaqinroq ko‘rinmoqda”, dedi SS WealthStreet tadqiqot firmasi asoschisi Sugandha Sachdeva.
Eron parlamenti bo‘g‘ozni yopish bo‘yicha chora-tadbirni ma’qullagan. Mamlakat o‘tmishda bo‘g‘ozni yopish bilan bir necha marta tahdid qilgan edi.
“Urushning neft infratuzilmasiga zarar yetkazish xavfi bir necha baravar oshdi. Mintaqadan tashqarida muqobil quvur yo‘llari mavjud bo‘lsa-da, agar Hormuz bo‘g‘oziga kirish cheklansa, xomashyoni to‘liq eksport qilib bo‘lmay qoladi”, dedi Sparta Commodities katta tahlilchisi June Goh.
Amerikaning transmilliy investitsiya banki va moliyaviy xizmatlar kompaniyasi Goldman Sachs’ning 22-iyun kungi hisobotida aytilishicha, agar Hormuz orqali neft oqimi bir oy davomida 2 baravarga va keyingi 11 oy davomida 10 foizga kamaysa, Brent narxi bir barrel uchun 110 dollargacha ko‘tarilishi mumkin. U 13-iyun kuni urush boshlanganidan beri 13 foizga, WTI esa 10 foizga oshib ketgandi.
Hormuz bo‘g‘ozi Eron milliy daromadlarining muhim manbai ekani hisobga olinsa, uning yopilishi mamlakatga jiddiy iqtisodiy zarar yetkazishi mumkin.
Izoh (0)