Hindistonning Kerala shtati hukumati Kochi shahridan taxminan 70 kilometr uzoqlikda konteyner kemasi cho‘kkanidan so‘ng qirg‘oqbo‘yi hududlarida favqulodda tayyorgarlik holatini e’lon qildi. Bu haqda The Indian Express nashri xabar berdi.
Ma’lum qilinishicha, kema bortida “xavfli yuk” hamda ko‘p miqdorda neft mahsulotlari bo‘lgan. Barcha ekipaj a’zolari qutqarib qolingan.
Qirg‘oqni qo‘riqlash xizmati ma’lumotlariga ko‘ra, konteyner kemasi Vijinjam portidan Hindistonning Kochi shahriga yo‘l olgan bo‘lgan. Kema shanba kuni qirg‘oqdan 38 dengiz mili uzoqlikda qiyshaya boshlagan, yakshanba kuni esa tryumlardan biriga suv to‘lib, ag‘darilib ketgan.
“Kema 640 ta konteyner, jumladan 13 ta xavfli yukli va 12 ta kalsiy karbidli konteynerni tashiyotgan edi. Bundan tashqari, kemada 84,44 tonna dizel yonilg‘isi hamda 367,1 tonna mazut bo‘lgan”, deb aytiladi xizmat xabarida.
Konteyner kemasi Liberiya bayrog‘i ostida suzgan. Taxminan 100 ta konteyner suvga tushib ketgan.
Cho‘kkan kema soatiga 3 kilometr tezlikda suzib bormoqda. Neft dog‘i Kerala qirg‘oqlariga yetib borishi mumkin. Konteynerlardagi neft mahsulotlari va kema yoqilg‘isi dengiz suviga tushgan.
Ta’kidlanishicha, neft mahsulotlari to‘kilishi oqibatlarini bartaraf etish bilan maxsus qirg‘oq qo‘riqlash kemasi shug‘ullanmoqda. Samolyot havoda vaziyatni kuzatib turibdi. Ehtiyot choralari sifatida mahalliy hokimiyat kema halokat sodir bo‘lgan joy atrofida 20 dengiz mili radiusda baliq ovlashni taqiqlagan.
22-may kuni Norvegiyada uzunligi 135 metr bo‘lgan NCL Salten konteyner tashuvchi kemasi sayozlikka tushib, qirg‘oq bo‘yidagi uy hovlisiga borib urilgandi.
Izoh (0)