Haftaning birinchi yarmida O‘zbekiston hududiga janubdan yana quruq va issiq havo kirib keladi, deb xabar bermoqda “O‘zgidromet”.
Prognozlarga ko‘ra, 23—25-iyun kunlari havo harorati kunduz kunlari 38-41 darajagacha, janubda va cho‘l hududlarda ba’zi joylarda 42-44 darajagacha ko‘tariladi. Bu kunlarda respublika bo‘yicha asosan kam bulutli va quruq ob-havo kuzatiladi. Faqat Qoraqalpog‘iston Respublikasida va Navoiy viloyati shimolida 24—25-iyun kunlari ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin, 25-iyunda harorat 26-31 darajagacha pasayadi.
Payshanba kuni respublikaning barcha hududlarida haroratning pasayishi kuzatiladi. Hududning katta qismida harorat 30-35 daraja atrofida bo‘ladi.
Juma kuni harorat biroz ko‘tariladi va 33-36 darajani, ba’zi joylarda 38 darajani tashkil etadi.
Respublika bo‘yicha ba’zi joylarda shamol tezligi 13-18 metr/sekundgacha kuchayishi kutilmoqda, 25—26-iyunda ayrim joylarda 20-22 metr/sekundgacha kuchayishi, chang-to‘zon bilan kuzatilishi mumkin.
23-iyunda Farg‘ona vodiysining ayrim tog‘li hududlarida, 26-iyunda respublikaning tog‘li hududlarida ba’zi joylarda qisqa muddatli yomg‘ir yog‘ishi mumkin.
Toshkentda asosan kam bulutli ob-havo bo‘ladi, yog‘ingarchilik kutilmaydi. 23—25-iyun kunlari harorat asosan kunduzi 38-41 daraja bo‘ladi, 26-iyunda 31-33 darajagacha pasayadi, 27-iyunda 34-36 daraja bo‘ladi.
Favqulodda vaziyatlar vazirligi jazirama issiqdan himoyalanish uchun aholiga qator tavsiyalar berib, iloji boricha soat 10:00 dan 17:00 gacha tik tushadigan quyosh nurlari ostida bo‘lmaslikni so‘ragandi. Sanitariya-epidemiologik osoyishtalik va jamoat salomatligi qo‘mitasi yozning jaziramasida qanday kiyinish kerakligi bo‘yicha bir necha tavsiyalar bergandi.
Izoh (0)