Jizzax viloyatining Zomin tumanidagi qator hududlarga 12-iyun kuni sel keldi. Bu haqda “O‘zgidromet” xabar berdi.
Jumladan, soat 14:10 larda “Kushtol” MFY, Konli QFYning yuqorisida joylashgan tog‘ va adirliklarida kuzatilgan jala yomg‘irlari natijasida sel yo‘lidan taxminan 2-3 m3/s sel oqimlari oqib o‘tgan. Hech qanday talafot kuzatilmagan.
Shuningdek, “Navbahor” MFY Segisari qishlog‘ining sel yo‘lidan taxminan 3-4 m3/s sel oqimlari oqib o‘tishi natijasida avtomobil yo‘liga tosh va shag‘allar chiqarib tashlangan. Boshqa hech qanday talafot kuzatilmagan.
Shu bilan birga, 14:30 larda Turkman qishlog‘ida taxminan 1.0-2.0 m3/s sel oqimlari oqib o‘tgan. Hozirga qadar hech qanday talafot kuzatilmagan.
Shu kabi, “Nihol” MFY Qizilsoy qishlog‘ida 1.5-2.5 m3/s sel oqimlari oqib o‘tishi oqibatida avtomobil yo‘liga tosh va shag‘allar chiqqan. Hech qanday talafot kuzatilmagan.
Bundan tashqari, “Taraqqiyot” MFY, Hulkar qishlog‘ida taxminan 1.5-2.0 m3/s sel oqimlari oqib o‘tgan. Avtomobil yo‘liga shag‘al toshlari chiqarib tashlagan.
FVVning xabariga ko‘ra, yo‘llar tozalanib, avtomobillar harakati davom etmoqda. Fuqarolar, aholi yashash xonadonlari, ijtimoiy soha obyektlari va chorva mollariga zarar yetmagan.
Hozirgi vaqtda FVDT xizmatlarining 10 ta maxsus texnikalari va 38 nafar shaxsiy tarkibi tomonidan sodir bo‘lgan sel oqimlari oqibatlarini bartaraf etish ishlari olib borilmoqda.
Shuningdek, Baxmal tumanining ko‘plab qishloqlarida ham sel hodisalari kuzatilayotgani aytilmoqda. Biroq bu borada rasmiy maʼlumot berilmadi.
16-iyungacha tog‘oldi va tog‘li hududlarda sel xavfi e’lon qilingandi. Jizzax viloyatining Zomin tumani, “Duoba” MFY, Yettikechuv QFYning yuqorisida joylashgan tog‘ va adirliklarida kuzatilgan jala natijasida 10-iyun soat 17:20 da sel oqimlari oqib o‘tgani xabar qilingandi.
May oyi oxirida ham Zomin tumanining ayrim hududlariga sel kelgan edi.
Izoh (0)