Checheniston rahbari Ramzan Qodirovning 17 yoshli o‘g‘li Adam Qodirov 28-iyun kuni uylandi. Bu haqda “Kavkaz.Realii” xabar berdi.
Ma’lum qilinishicha, to‘y Qodirovlar oilasining ota qishlog‘i Axmat-Yurtda (sobiq Sentoroy) bo‘lib o‘tgan. Kelin Ramzan Qodirovning eng yaqin safdoshi, davlat dumasi deputati Adam Delimxonovning nabirasi hisoblanadi. Adamning opasi Ayshat Qodirova qizning ismini oshkor qilgan, uning ismi Medni ekani ma’lum. U ham yuqori martabali qodirovchilar yashaydigan Axmat-Yurt qishlog‘idan.
To‘y kuni respublikada yo‘llar yopilib, xavfsizlik choralari kuchaytirilgan. Kortejni kuzatib borishga Chechenistonning barcha tumanlaridan YHXB xodimlari jalb etilgan. Adam Qodirovning uylanish faktini uning otasi tasdiqlagan.
Ramzan Qodirov o‘zining Telegram kanalida o‘g‘lini to‘yidan oldin shaxsan Rossiya prezidenti Vladimir Putin tabriklagani haqida post qoldirgan.
Hurmatli Vladimir Vladimirovich! Checheniston birinchi prezidenti, Rossiya qahramoni Ahmad-Hoji Qodirovning nabirasi Adam Qodirovni oilaviy hayotga qadam qo‘ygani bilan shaxsan tabriklaganingiz uchun butun oilamiz nomidan sizga chuqur minnatdorlik bildirmoqchiman, deb yozgan Qodirov.
Shuningdek, “VCHK-OGPU” Telegram kanalida kichik Qodirovning to‘yidan olingan suratlar e’lon qilingan. To‘y vaqtida Adam Qodirovning qo‘lida Jacob & Co.Billionaire ASHOKA soati bo‘lganini ko‘rish mumkin. U 320 ta brilliant bilan bezatilgan, qiymati esa 27,7 mln dollarni tashkil etadi.
Rossiya Oila kodeksining 13-moddasiga ko‘ra, nikohga kirish yoshi 18 yosh etib belgilangan. Biroq asosli sabablar bo‘lsa, yashash joyidagi mahalliy o‘zini o‘zi boshqarish organlari 16 yoshga to‘lgan shaxslarga ularning iltimosiga binoan turmush qurishga ruxsat berishi mumkin.
Izoh (0)