Eron-Isroil urushi G‘azo sektoridagi mojaroni hal etish bo‘yicha muzokaralarda erishilgan yutuqlarni yo‘qqa chiqardi. Bu haqda bosh vazir maslahatchisi, Qatar TIV rasmiy vakili Majid bin Muhammad al-Ansoriy matbuot anjumanida ma’lum qildi.
“G‘azo sektorida ehtimoliy o‘t ochishni to‘xtatish bo‘yicha bizning baholarimizga kelsak, biz Eron va AQSH o‘rtasida, shuningdek, (Falastin harakati) HAMAS va Isroil o‘rtasida ijobiy o‘zgarishlarni kuzatgan edik. Bu ijobiy jarayon Isroilning Eronga hujumi tufayli buzildi. Shu bois ushbu ijobiy yo‘nalishga qaytishning yagona yo‘li mintaqadagi keskinlikni yumshatish va diplomatik aloqalarni tiklash yo‘llarini izlashdir. Ayni paytda biz aynan shu masala ustida ishlamoqdamiz”, deya ta’kidladi u.
Eslatib o‘tamiz, 18-mart kuni Isroil Mudofaa kuchlari joriy yilning yanvarida o‘rnatilgan o‘t ochishni to‘xtatish rejimini bekor qilib, G‘azo sektorida jangovar harakatlarni qayta boshladi. Qatar, Misr va AQSH vositachiligidagi bir necha bosqichli muzokaralardan so‘ng Falastinning HAMAS harakati va Isroil yarash shartlarini kelisha olmadi.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
