Toshkentda Alfraganus universiteti tashabbusi bilan “Yoshlar kelajagi va ta’limda tadbirkorlik” mavzusida xalqaro anjuman ish boshladi

Toshkent shahridagi Intercontinental mehmonxonasida Alfraganus universiteti tashabbusi hamda homiyligida “Yoshlar kelajagi va ta’limda tadbirkorlik” mavzusida o‘ninchi marotaba o‘tkazilayotgan UNESCO-APEID kengashi yig‘ilishi bo‘lib o‘tmoqda. Bu haqda tadbirda qatnashgan “Daryo” muxbiri xabar berdi. 

Mazkur xalqaro anjuman Markaziy Osiyoda birinchi marotaba tashkil etilmoqda. Bu konferensiya mamlakatimiz prezidentining 2024-yilni “Yoshlar va tadbirkorlikni qo‘llab-quvvatlash yili”, deb nomlashi doirasida amalga oshirilmoqda. Ayni kunda Toshkentda bo‘lib o‘tayotgan konferensiya shu kunga qadar faqat Xitoy va Taylandda o‘tkazilgan. Bu galgi anjumanda 35 dan ortiq davlatlarning 100 ga yaqin vakillari ishtirok etmoqda. Konferensiyadan ko‘zlangan asosiy maqsad talabalarimizga o‘qish bilan birgalikda tadbirkorlikni chuqur o‘rgatish va kelajakda aynan shu orqali ularning bandligini ta’minlashdan iborat,  deydi Alfraganus universiteti rektori Muhammadismoil Mahmudov.

Rektorning bildirishicha, anjumanga kelgan 35 dan ortiq davlatlarning 100 ga yaqin vakillari Alfraganus universitetida yana 10 kun qolib, talabalarga bilimlarini ulashadi. 

Katta xalqaro anjumanga nega apynan Alfraganus universiteti mezbonlik qilmoqda?

2023-yilning 26—28-oktyabr kunlari Xitoyning Xanchjou shahrida bo‘lib o‘tgan UNESCO-APEID ta’lim sohasida tadbirkorlik bo‘yicha to‘qqizinchi uchrashuvda O‘zbekiston respublikasi vakili bo‘lgan Alfraganus universiteti o‘ninchi uchrashuvni O‘zbekistonning Toshkent shahrida o‘tkazish haqida tashabbus bilan chiqdi. Prezidentimiz Shavkat Mirziyoyev tomonidan 2024-yilning “Yoshlar va tadbirkorlikni qo‘llab-quvvatlash yili” deb e’lon qilingani bois bu tashabbus dolzarb hamda o‘z vaqtida amalga oshirilmoqda,  deydi Alfraganus universitetining Iqtisodiyot fakulteti dekani, professor Alisher To‘ychiyev. 

Alisher To‘ychiyevning aytishicha, mazkur anjumanda xorijlik olimlar bilan birga tadbirkorlar ham ishtirok etmoqda. 

Talimda tadbirkorlikni rivojlantirish orqali universitetimizda tahsil oluvchi 21 ming nafardan ortiq talabalarning aynan iqtisodiyot fakultetida o‘qiyotgan olti ming nafaridan ortig‘ini sohaning yetuk bilimdoni qilish barobarida shu sohaning lideri qilish tarafdorimiz. Bugungi yig‘ilish Alfraganus universitetidan yirik tadbirkorlar, olimlar chiqishida katta ahamiyat kasb etadi, deydi professor Alisher To‘ychiyev.

Universitet dekanining qo‘shimcha qilishicha, O‘zbekistonda ta’limda tadbirkorlikni rivojlantirish tashabbusi bundan 10 yil avval boshlangan va davom etmoqda. Bu harakatlar yana besh-o‘n yilda o‘z natijasini ko‘rsatadi. 

UNESCOning an’anaviy o‘ninchi tadbiri ya’ni yoshlarning tadbirkorlik ta’limiga bag‘ishlangan anjuman aynan O‘zbekistonda o‘tkazilishi bejiz emas. Boisi, mamlakat so‘nggi yetti yilda hududdagi mamlakatlar orasida nafaqat iqtisodiy rivojlanish, mahalliy va xususiy biznes rivoji, yoshlarda biznes ko‘nikmalarini shakllantirish borasida ham yetakchi davlatga aylandi. Shu sabab ham bugun Toshkentda katta xalqaro anjuman bo‘lib o‘tmoqda,  deydi UNESCOning Toshkentdagi vakili Baxtiyor Namozov. 

Bildirilishicha, ikki kunlik anjuman yakunida 34 ta davlatdan kelgan 100 ga yaqin ekspertlar, yetakchi oliy ta’lim muassasalarining professor-o‘qituvchilari, tadbirkorlar, xalqaro tashkilotlar vakillari ishtirokida yoshlar va tadbirkorlik ta’limi bo‘yicha Toshkent deklaratsiyasi imzolanadi.

Reklama huquqi asosida.