Markaziy bank 2024-yilning to‘qqiz oyi davomida aholiga ajratilgan ipoteka kreditlari bo‘yicha maʼlumot berdi.
Qayd etilishicha, yanvar—sentyabr oylarida O‘zbekiston aholisiga 11,72 trillion so‘m miqdorida ipoteka kreditlari ajratilgan. Bunda respublikada jami 42 ming 790 nafar fuqaro banklardan foizli qarz olgan bo‘lib, ularning 27,1 ming nafari (63 foizi) erkaklar, 15,6 ming nafari (37 foizi) xotin-qizlar hissasiga to‘g‘ri kelgan.
Ipoteka kreditlarining 65 foizi birlamchi bozordagi uylarga, 35 foizi ikkilamchi bozordagi uylarga ajratilgan. Foizli qarzlarning 65 foizini 31–50 yoshlar oralig‘idagi insonlar, 27 foizini 18–30 yoshdagilar, 8 foizini 50 yoshdan yuqori bo‘lganlar olgan.
Yanvar–sentyabr oylarida “Yangi tartib” dasturi bo‘yicha mamlakatning 23,7 ming fuqarosiga 6,07 trillion so‘m miqdorida ipoteka kreditlari ajratilgan.
Eng ko‘p kreditlar Toshkent shahri aholisiga berilgan — 3 536,9 milliard so‘m. Keyingi o‘rinlarda:
- Samarqand viloyati (1019,2 milliard so‘m);
- Farg‘ona viloyati (1011,4 milliard so‘m);
- Andijon viloyati (834,7 milliard so‘m);
- Navoiy viloyati (748,8 milliard so‘m);
- Toshkent viloyati (648,7 milliard so‘m).
-O5PxUBtw.jpg)
Markaziy bankning maʼlum qilishicha, 2024-yilning to‘qqiz oyida tijorat banklari tomonidan aholiga 11,7 trillion so‘m ipoteka kreditlari ajratilgan. Bu ko‘rsatkich 2023-yilda 16, 9 trillion so‘m, 2022-yilda 14,4 trillion so‘m, 2021-yilda 9,8 trillion so‘m, 2020-yilda 9,1 trillion so‘mni tashkil etgan.
“2024-yilda ipoteka kreditlarini ajratish mexanizmlarini takomillashtirish va aholining uy-joy sharoitlarini yaxshilashga oid qo‘shimcha chora-tadbirlar to‘g‘risida”gi prezident farmoni qabul qilingandi. Unga ko‘ra, mazkur kredit miqdori Qoraqalpog‘iston Respublikasi va viloyatlarda — 330 million so‘mgacha, Toshkent shahrida — 420 million so‘mgacha qilib belgilangan.
2024-yil 23-sentyabr kuni ipoteka kreditlari bo‘yicha subsidiyalar to‘lashning tasdiqlangan maqsadli parametrlari doirasida arizalar qabul qilishning ikkinchi bosqichi boshlandi.
Izoh (0)