Turk kinosining yulduzli juftligi Burak O‘zchivit va Fahriye Evjenning farzandlari hozirda qanday ko‘rinishga ega? (foto)

39 yoshli turk aktyori Burak O‘zchivit “Choliqushi”, “Sevgi iztirobi” va “Muhtasham yuz yil” seriallaridagi rollari bilan mashhurlik cho‘qqisiga erishganidan so‘ng, muxlislar uning shaxsiy hayotiga ham katta qiziqish bildira boshladi. Biroq aktyor hayoti haqida ortiqcha so‘zlamaslikka harakat qiladi va oilasida bo‘layotgan voqealarni keng jamoatchilikka ma’lum qilishni istamaydi.

Ma’lumki, Burak O‘zchivit turk aktrisasi Fahriye Evjen bilan 2017-yilda turmush qurgan. Hozirda ular ikki nafar farzandi ­— Karan va Kerem ismli o‘g‘illari tarbiyasi bilan mashg‘ul.

Burak ish faoliyati davomida ko‘p vaqt syomkalarda bo‘lsa-da, aktyor doimo oilasi va farzandlariga vaqt ajratishga ulguradi. Intervyulardan birida u o‘g‘illarini doimo o‘zi uxlatishi va bu jarayonga alohida e’tibor qaratishi haqida aytib o‘tgan.

Oilada to‘ng‘ich farzand Karan hozirda 4 yoshda bo‘lib, unda ota kasbiga katta qiziqish uyg‘ongan. Karan 2 yoshidan boshlab katta gonorar ola boshlagan. Aktrisa Fahriye o‘g‘li bilan tagliklar reklamasida suratga tushgan va 5 sekundlik reklama uchun bolakay salkam 40 ming dollar daromad olgan.

Yulduzli juftlik ikkinchi farzandni kutayotganini uzoq vaqt sir saqlagan. Xushxabar haqida ular 2023-yil boshida, Karanning tug‘ilgan kuni sharafiga o‘tkazilgan bayramda xabar qildi. O‘sha vaqtda O‘zchivitning kenja o‘g‘li 3 oylik edi.

Shundan so‘ng Burak oilaviy tushgan suratni internetga joylashtirdi. Unda Karan qo‘lida tug‘ilgan kuni torti bilan, Fahriye esa qo‘lida 3 oylik chaqaloq — Kerem ismli kenja o‘g‘lini ko‘tarib turardi.

Burak otalik haqida fikrlari bilan o‘rtoqlashdi:

“Men va rafiqam ikki ajoyib o‘g‘il ota-onasi ekanligimizdan g‘oyat baxtiyormiz. Bilasizmi, men allaqachon uyqusiz tunlarga o‘rganib qolganman. To‘ng‘ich o‘g‘lim Karan menga bu borada yaxshi tajriba bergan”.

Aktyor so‘zlariga ko‘ra, farzandlarga ismlarni Fahriye bilan birgalikda tanlashgan. Aka-uka o‘rtasida mustahkam do‘stlik o‘rnatish uchun ularga o‘xshash talaffuzli ismlar qo‘yishgan.

Yulduzlar oilasi hech qanday enaga yollamaslikni ma’qul ko‘radi. Burak aytishicha, farzandlar bilan birga vaqt o‘tkazish uning hayotidagi eng baxtiyor onlardan biridir.