O‘zbekistonda avtomaktab o‘qituvchilari Ichki ishlar vazirligi akademiyasida malaka oshiradi

Haydovchilar tayyorlovchi taʼlim tashkilotlari o‘qituvchi va haydovchi-yo‘riqchilarini qayta tayyorlash va malakasini oshirishni tartibga soluvchi nizom Adliya vazirligida davlat ro‘yxatidan o‘tkazildi. Bu haqda Telegram’dagi “Huquqiy axborot” kanali xabar berdi.

Nizomga ko‘ra, taʼlim tashkilotlari o‘qituvchi va haydovchi-yo‘riqchilarini shartnoma asosida qayta tayyorlash hamda ularning malakasini oshirish (har 3 yilda bir marta) Ichki ishlar vazirligi akademiyasi tomonidan amalga oshiriladi.

Bunda tinglovchilar asosiy ish joyidan ajralgan holda o‘qitiladi. O‘quv jarayoni 25 nafardan ortiq bo‘lmagan tinglovchidan iborat guruhlarda tashkil qilinadi. Mazkur kurslarda o‘qish uchun talabgorlar akademiyaning rasmiy veb-sayti orqali ariza bilan murojaat qiladi.

Ariza kelib tushgan kundan eʼtiboran 3 ish kuni ichida o‘rganib chiqilib, kamchiliklar aniqlanmagan taqdirda akademiya va talabgor o‘rtasida shartnoma tuziladi.

To‘lov miqdorlari:

• haydovchi-yo‘riqchilarni qayta tayyorlash, shuningdek, malakasini oshirish kurslarining har biri uchun – BHMning 4,5 baravari (1 million 350 ming so‘m);
• o‘qituvchilarni qayta tayyorlash kursi uchun – BHMning 4 baravari (1,2 million so‘m), ularning malakasini oshirish kursi uchun – BHMning 7 baravari (2,1 million so‘m).

Tinglovchilarga ularning o‘quv jarayonida ishtirokini taʼminlash hamda o‘quv dasturlarini o‘zlashtirishda tyutor (o‘qituvchi-konsultant) yordamlashadi.

Qayta tayyorlash kursini muvaffaqiyatli tamomlagan tinglovchiga diplom, malaka oshirish kursini tamomlagan tinglovchiga esa sertifikat taqdim etiladi.

Fevral boshlarida IIV avtomototransport vositalari va shahar elektr transporti vositalari haydovchilarini tayyorlash hamda qayta tayyorlashni lisenziyalash bo‘yicha vakolatli organ etib belgilangandi.