O‘zbekiston JSTga a’zo bo‘lish uchun faol muzokaralar olib bormoqda – Investitsiyalar va tashqi savdo vazirligi
Hozirda O‘zbekiston Jahon savdo tashkilotiga (JST) a’zo bo‘lish uchun faol muzokaralar olib bormoqda. Bu haqda Investitsiyalar va tashqi savdo vazirligi bosh mutaxassisi Alijon Aliyev “Daryo”ga bergan intervyusida ma’lum qildi.
Bugun, 1-dekabr kuni Toshkent shahrida O‘zbekiston JSTga a’zo bo‘lishining xususiy sektorga ta’siri bo‘yicha davra suhbati bo‘lib o‘tmoqda. Tadbir doirasida Alijon Aliyev JSTga a’zolik borasida qilinayotgan ishlar to‘g‘risida ma’lumot berdi.
Hozir JSTga a’zo davlatlar bilan faol muzokaralar olib borilmoqda. Bunda qator masalalar muhokama qilinyapti. Muzokaralarga xalqaro ekspertlarni jalb etganmiz, ular bizga yordam bermoqda. Masalan, bugungi tadbir ham BMT taraqqiyot dasturi va JST kotibiyati ko‘magi bilan o‘tkazilmoqda.Alijon Aliyevning qo‘shimcha qilishicha, JSTga uchta tasnifdan biriga mos kelish orqali a’zo bo‘lish mumkin.JSTga qo‘shilish uchun milliy qonunchilikka bir qator o‘zgartirishlar kiritish, iqtisodiy tarmoqlarni rivojlantirish uchun qator ilmiy tadqiqot ishlarini olib borish zarur. Bugungi kunda bizdagi eng ilg‘or sohalar hisoblanadigan elektrotexnika, kimyo sanoati, to‘qimachilik, qishloq xo‘jaligi yo‘nalishlarida JSTga qo‘shilish oqibatlarini baholash yuzasidan xalqaro ekspertlar bilan ilmiy tadqiqot ishlarini olib boryapmiz.
JSTga a’zo bo‘lish orqali bizda yangi turdagi mahsulotlarni yetishtirish imkoniyati paydo bo‘ladi. Turli sohalarda xorijiy davlatlar tajribasini o‘rganish ko‘lami ham kengayadi. Eng asosiysi, JST bizga investitsion muhitni yaxshilashga, eksport bozorlarimizni diversifikatsiya qilishga katta yordam beradi. Bu o‘z-o‘zidan eksport hajmining oshishiga olib keladi.
JSTga a’zo bo‘lish bo‘yicha aniq bir vaqtni taxmin qilish qiyin. Chunki bu tashkilotga faqatgina muzokaralar orqaligina qo‘shila olamiz. Hozir O‘zbekiston faol muzokaralar jarayonida.
“Hozirda JSTga 164 ta davlat a’zo. Bu tashkilotga 3 tasnif asosida, ya’ni rivojlangan, rivojlanayotgan va eng kam rivojlangan davlatlar maqomida qo‘shilish mumkin. Biz rivojlanayotgan davlat maqomida qo‘shilishga intilyapmiz. Bunda bizga qator imkoniyatlar ochiladi. Masalan, o‘tish davriga uzoqroq vaqt beriladi. JSTga qo‘shilsak, xalqaro savdo tizimida o‘z ovozimizga ega bo‘lamiz. Xalqaro qarorlar qabul qilishda O‘zbekiston ovozi ham inobatga olinadi”, – dedi vazirlik vakili.
