“Biz uchun JSTga qo‘shilish mutlaq ustuvor vazifa” –  tashqi savdo vaziri o‘rinbosari Badriddin Obidov

O‘zbekiston uchun Jahon savdo tashkilotiga (JST) qo‘shilish mutlaq ustuvor vazifa. Bu haqda Investitsiyalar va tashqi savdo vazirining o‘rinbosari Badriddin Obidov xususiy sektor vakillari ishtirokidagi davra suhbatida ma’lum qildi, deya xabar bermoqda “Daryo” muxbiri.

Badriddin Obidovning aytishicha, so‘nggi 3 yil ichida respublika JSTga a’zo bo‘lishga qaratilgan faoliyatni qayta tikladi va jarayonni sezilarli darajada oldinga surdi.

Biz uchun JSTga qo‘shilish mutlaq ustuvor vazifa hisoblanadi. Biz bu jarayonga O‘zbekistonning jahon iqtisodiy hamjamiyati va ko‘p tomonlama savdo tizimiga yanada integratsiyalashuviga qaratilgan islohotlarning ajralmas qismi sifatida qaraymiz. Mamlakatimizning Jahon savdo tashkilotiga qo‘shilishi doirasida mazkur tashkilot bilan ishlash tizimi yaratildi, ya’ni Bosh vazir o‘rinbosari – investitsiyalar va tashqi savdo vaziri Jamshid Xo‘jayev rahbarligida JST bilan ishlash bo‘yicha Idoralararo komissiyasi shakllantirildi. Investitsiyalar va tashqi savdo vazirining o‘rinbosari boshchiligida muzokaralar guruhi hamda tegishli vazirliklar va idoralar mas’ul xodimlaridan iborat 10 ta tematik ishchi guruh tarkiblari tashkil etildi.

Ma’lum qilinishicha, tematik ishchi guruhlar quyidagi yo‘nalishlarda faoliyat olib bormoqda:

• tovarlar bozoriga kirish;
• xizmatlar bozoriga kirish;
• qishloq xo‘jaligi;
• savdodagi texnik to‘siqlar;
• sanitariya va fitosanitariya choralari;
• intellektual mulk huquqlarining savdo jihatlari;
• bojxona masalalari va savdoni soddalashtirish;
• subsidiyalar va davlat savdo korxonalalari;
• Milliy qonunchilikni JST bitimlariga uyg‘unlashtirish;
• JSTga a’zo bo‘lish oqibatlarini o‘rganish.

Badriddin Obidovning qo‘shimcha qilishicha, JSTga qo‘shilishning iqtisodiyot tarmoqlariga salbiy ta’sir ko‘rsatishi mumkinligi bo‘yicha qator tadqiqotlar ham bor.

“Bunday xavflarni qat’iy muzokaralar va alohida sektorlar uchun qo‘shilish oqibatlarini chuqur o‘rganish bo‘yicha tadqiqotlarni amalga oshirish orqali bartaraf etish imkoniyatlari mavjud. Yuqoridagilarni anglagan holda yetakchi xalqaro va milliy ekspertlarni jalb qilib, O‘zbekistonning JSTga a’zoligidan kelib chiqadigan salbiy oqibatlarini baholash va minimallashtirish bo‘yicha bir qator ilmiy-tadqiqot ishlari olib borilmoqda. Xususan, to‘qimachilik, elektrotexnika, avtomobilsozlik, metallurgiya, kimyo va boshqa tarmoqlar uchun tashkilotga a’zo bo‘lish oqibatlarini baholashga qaratilgan tadqiqot loyihalari shular jumlasidandir. Shu bilan birga, biz muzokaralar jarayonida ilg‘or tajribalarni to‘plash va qo‘llash maqsadida boshqa mamlakatlarning qo‘shilish tajribalarini o‘rganish bo‘yicha doimiy ravishda tizimli ishlar olib bormoqdamiz”, – dedi vazirlik rasmiysi.

Avvalroq O‘zbekiston JSTga a’zo bo‘lish uchun faol muzokaralar olib borayotgani xabar qilingandi.