JSST maymunchechak nomini rasman o‘zgartirdi

Jahon sog‘liqni saqlash tashkilotining (JSST) hujjatlarida maymunchechak kasalligi rasman MPOX deb nomladi. Tegishli ma’lumot tashkilot saytida e’lon qilindi.

“Global ekspertlar bilan bir qator maslahatlashuvlardan so‘ng JSST maymunchechakning sinonimi sifatida yangi, afzal bo‘lgan variant MPOX atamasidan foydalanishni boshlaydi”, — deyiladi bayonotda.

Yil davomida MPOX atamasiga moslashish uchun bosqichma-bosqich “maymunchechak” so‘zidan foydalanish kamaytiriladi. JSST bir qator shaxslar va davlatlar kasallik nomini o‘zgartirishni so‘raganini ta’kidladi. Buning sababi, bir qator mamlakatlarda maymunchechakning tarqalishi natijasida, Internetda “irqchilik va qoralovchi bayonotlar” ko‘paygan.

JSST Bosh direktori Tedros Adhanom Gebreyesus maymunchechak uchun “yangi ingliz sinonimi, MPOX”ni tavsiya qilgan.

“Bir yillik o‘tish davridan keyin MPOX afzal atama bo‘ladi”, deb tushuntirgan tashkilot. Mazkur atama kasalliklarning xalqaro tasnifiga kiritiladi.

Maymunchechak — yuqumli kasallik. U birinchi marta 1958-yilda, asosan Afrikada topilgan. Biroq 2003-yilda virus qit’adan tashqariga chiqdi: AQSHda yashovchilar ham uni yuqtirdi.

Zamonaviy amaliyotga ko‘ra, yangi aniqlangan viruslar, infeksiyalar mutatsiyalari va ular bilan bog‘liq kasalliklar atamalari madaniy, ijtimoiy, milliy, mintaqaviy, kasbiy yoki etnik jihatdan kamsituvchi mazmunga ega bo‘lmasligi zarur. JSST virus nomini o‘zgartirish harakatini yoz oylarida boshlagandi.