Foto: Zarbalardan keyin chiroqsiz qolgan Ukrainaning koinotdan ko‘rinishi

AQSH Aeronavtika va koinotni tadqiq qilish milliy boshqarmasi (NASA) 24-noyabr kuni sun’iy yo‘ldoshdan olingan tasvirlarni e’lon qildi, ularda qorong‘ilikka cho‘mgan Ukrainani ko‘rish mumkin.

Surat tunda olingan. Unda bu vaqtda Ukrainani o‘rab turgan boshqa mamlakatlarda chiroq yonib turganini, uning hududida esa faqat bir nechta joyda yorug‘lik oqarib turganini ko‘rish mumkin, xolos.

Rossiya Mudofaa vazirligi 10-oktabrdan buyon Ukrainaning harbiy va energetika obyektlariga muntazam raketa zarbalari berib kelmoqda va buni 8-oktabr kuni Kerch bo‘g‘ozidagi Qrim ko‘prigi portlatilishiga javob deb atamoqda.

Ukraina hukumati ma’lumotlariga ko‘ra, 15-noyabr kuni Rossiya mamlakat energetika tizimiga urush boshidan buyon eng kuchli zarbani bergan. O‘qqa tutishlar fonida Ukrainada elektr energiyasi vaqti-vaqti bilan o‘chirib qo‘yilmoqda.

Bunday hujumlarning so‘nggisi 23-noyabrda sodir bo‘ldi. Zelenskiyning aytishicha, Rossiya 67 ta raketa uchirgan, oqibatda Kiyev, Odessa va Chernigov viloyatlari elektrdan uzilib qolgan.

Rossiya prezidenti matbuot kotibi Dmitriy Peskov Ukrainaning ko‘plab hududlarida chiroq va issiqlik yo‘qligini muzokaralardan bosh tortayotgan Kiyev hukumati xatti-harakatlari oqibati deb atadi.

O‘z navbatida, Ukraina Energetika vazirligi raketa zarbalaridan keyin mamlakat aholisining aksariyati elektrdan uzilib qolganini ma’lum qildi. Zarbalardan so‘ng Ukrainaning uchta atom elektr stansiyasi energiya tizimidan uzib qo‘yildi. “Ukrenergo” milliy energetika kompaniyasi boshqaruv raisi Vladimir Kudritskiy 23-noyabrdagi hujumdan avvalroq mamlakatda zarar ko‘rmagan issiqlik va gidroelektr stansiyalari qolmaganini aytgandi. Zelenskiy esa energetika bilan bog‘liq vaziyatni og‘ir deb atadi.

Avvalroq Ukraina prezidenti Vladimir Zelenskiyning rafiqasi Yelena Zelenskaya Ukraina aholisining katta qismi Yevroittifoqqa a’zo bo‘lish uchun chiroqsiz va issiqlik ta’minotisiz yashashga tayyorligini aytgandi. Uning qayd etishicha, ukrainaliklar nimani deb sabr qilishni biladi va o‘z mamlakati kelajagiga optimizm bilan qaraydi.