Ukraina aholisining katta qismi Yevroittifoqqa a’zo bo‘lish uchun chiroqsiz va issiqlik ta’minotisiz yashashga tayyorligini bildirgan. Bu haqda Ukraina prezidenti Vladimir Zelenskiyning rafiqasi Yelena Zelenskaya BBC’ga bergan intervyusida ma’lum qildi.
Uning so‘zlariga ko‘ra, o‘tgan hafta Ukrainada ijtimoiy tadqiqot o‘tkazilib, mamlakat aholisidan yana qancha vaqt bunday sharoitda yashashga rozi bo‘lishi haqida so‘ralgan.
“Bilamiz, agar uylarimizda issiqlik bo‘lmasa, qish mavsumi biz uchun yana bir sinovga aylanadi. Ukrainaliklarning aksariyati, ya’ni so‘ralganlarning 90 foizi esa, agar Yevroittifoqqa a’zo bo‘lish istiqboli real bo‘lsa, yana ikki-uch yil chidashga tayyorligini bildirdi. Ular ushbu Yevropa oilasining teng huquqli a’zosiga aylanishni xohlaydi”, — dedi Zelenskaya va blekaut — Ukraina bilan yuz berishi mumkin bo‘lgan eng dahshatli narsa emasligini ta’kidladi.
Uning qayd etishicha, ukrainaliklar nimani deb sabr qilishni biladi va o‘z mamlakati kelajagiga optimizm bilan qaraydi.
Rossiya Mudofaa vazirligi 10-oktabrdan buyon Ukrainaning harbiy va energetika obyektlariga muntazam raketa zarbalari berib kelmoqda va buni 8-oktabr kuni Kerch bo‘g‘ozidagi Qrim ko‘prigi portlatilishiga javob deb atamoqda.
Ukraina hukumati ma’lumotlariga ko‘ra, 15-noyabr kuni Rossiya mamlakat energetika tizimiga urush boshidan buyon eng kuchli zarbani bergan. O‘qqa tutishlar fonida Ukrainada elektr energiyasi vaqti-vaqti bilan o‘chirib qo‘yilmoqda.
Bunday hujumlarning so‘nggisi 23-noyabrda sodir bo‘ldi. Zelenskiyning aytishicha, Rossiya 67 ta raketa uchirgan, oqibatda Kiyev, Odessa va Chernigov viloyatlari elektrdan uzilib qolgan.
Rossiya prezidenti matbuot kotibi Dmitriy Peskov Ukrainaning ko‘plab hududlarida chiroq va issiqlik yo‘qligini muzokaralardan bosh tortayotgan Kiyev hukumati xatti-harakatlari oqibati deb atadi.
O‘z navbatida, Ukraina Energetika vazirligi raketa zarbalaridan keyin mamlakat aholisining aksariyati elektrdan uzilib qolganini ma’lum qildi. Zarbalardan so‘ng Ukrainaning uchta atom elektr stansiyasi energiya tizimidan uzib qo‘yildi. “Ukrenergo” milliy energetika kompaniyasi boshqaruv raisi Vladimir Kudritskiy 23-noyabrdagi hujumdan avvalroq mamlakatda zarar ko‘rmagan issiqlik va gidroelektro stansiyalari qolmaganini aytgandi. Zelenskiy esa energetik bilan bog‘liq vaziyatni og‘ir deb atadi.
Izoh (0)