Foto: Piyodalar va faol turmush tarzi uchun yaratilgan Parijning sportga oshno odamlari
Fransiya poytaxti Parij shahridagi xiyobonlar, ko‘cha va bog‘larda, ko‘pqavatli uylar orasi-yu, stadionlarda erta-yu kech yugurib yurgan sport kiyimlaridagi odamlarni uchratish tabiiy hol. Ammo eng qizig‘i ular professional sportchilar emas, balki oddiy aholi. Fransuzlar uchun harakatchanlik va sog‘lom ovqatlanish — salomatlik, sarvqomatlik hamda uzoq umr kafolati. Bu yerda sport deganda insonlar shunchaki futbol o‘yinlaridagi natijalar ustida tortishishni tushunmaydilar. Mubolag‘asiz aytganda, aksariyat parijliklar ko‘p piyoda yuradi, yurmasa yuguradi, yugurib yeta olmaydigan masofalariga esa velosiped, skuter, motosikl yoki shunga o‘xshash yengil transport vositalari bilan yetib oladi. Shu sabablimi, hatto 40-50 yoshli fransuzlar ham yoshiga nisbatan ancha dadil.
Shahar bo‘ylab dorixonalarni uchratish juda qiyin. Mahalliy aholi vakillarining so‘zlariga ko‘ra, bu fransuzlarning asosan sog‘lom hayot kechirishga intilishi, tabiiy mahsulotlar va foydali oziq-ovqatlarni tanovul qilishi bilan bog‘liq. Bundan tashqari, nafaqadagilar ham o‘zlariga g‘amxo‘rlik qilishadi, faol turmush tarzi kechirib, ko‘p sayohat qiladi. Parijda yengil atletika musobaqalarida 70-80 yoshli ayol yoki erkakni uchrashish odatiy hol. Sport zallarida yoshi ulug‘lar ko‘p. Bu yerda odamlar kamdan-kam hollarda shifoxonalarda shifokorlarga murojaat qilishadi.
“Daryo” fotomuxbiri poytaxtning bir qancha ko‘chalarida bo‘lib, ana shunday sportsevar aholiga ega shahar ko‘chalarini kadrlarga muhrladi.
