Фото: Пиёдалар ва фаол турмуш тарзи учун яратилган Парижнинг спортга ошно одамлари

Франция пойтахти Париж шаҳридаги хиёбонлар, кўча ва боғларда, кўпқаватли уйлар ораси-ю, стадионларда эрта-ю кеч югуриб юрган спорт кийимларидаги одамларни учратиш табиий ҳол. Аммо энг қизиғи улар профессионал спортчилар эмас, балки оддий аҳоли. Французлар учун ҳаракатчанлик ва соғлом овқатланиш — саломатлик, сарвқоматлик ҳамда узоқ умр кафолати. Бу ерда спорт деганда инсонлар шунчаки футбол ўйинларидаги натижалар устида тортишишни тушунмайдилар. Муболағасиз айтганда, аксарият парижликлар кўп пиёда юради, юрмаса югуради, югуриб ета олмайдиган масофаларига эса велосипед, скутер, мотоцикл ёки шунга ўхшаш енгил транспорт воситалари билан етиб олади. Шу сабаблими, ҳатто 40-50 ёшли французлар ҳам ёшига нисбатан анча дадил.

Шаҳар бўйлаб дорихоналарни учратиш жуда қийин. Маҳаллий аҳоли вакилларининг сўзларига кўра, бу французларнинг асосан соғлом ҳаёт кечиришга интилиши, табиий маҳсулотлар ва фойдали озиқ-овқатларни тановул қилиши билан боғлиқ. Бундан ташқари, нафақадагилар ҳам ўзларига ғамхўрлик қилишади, фаол турмуш тарзи кечириб, кўп саёҳат қилади. Парижда енгил атлетика мусобақаларида 70-80 ёшли аёл ёки эркакни учрашиш одатий ҳол. Спорт залларида ёши улуғлар кўп. Бу ерда одамлар камдан-кам ҳолларда шифохоналарда шифокорларга мурожаат қилишади.

«Дарё» фотомухбири пойтахтнинг бир қанча кўчаларида бўлиб, ана шундай спорцевар аҳолига эга шаҳар кўчаларини кадрларга муҳрлади.