Turkiya Finlyandiya va Shvetsiyaning NATOga kirishini qo‘llab-quvvatlamayapti

Turkiya Finlyandiya va Shvetsiyaning Shimoliy Atlantika ittifoqiga (NATO) kirishini qo‘llab-quvvatlamayapti, deb xabar berdi Deutsche Welle.

NATO bosh kotibi Yens Stoltenberg Turkiya tashqi ishlar vaziri Mevlut Chavusho‘g‘li bilan o‘tkazgan qo‘shma matbuot anjumanida Shvetsiya va Finlyandiya tezroq NATOga qabul qilinishi kerakligini, ular Turkiyaning talablarini allaqachon bajarganini aytdi.

“Finlyandiya va Shvetsiyani NATOning to‘laqonli a’zosi sifatida kutib olish vaqti keldi, bu alyansning o‘zini ham mustahkamlaydi va unga a’zo barcha mamlakatlar xavfsizligini oshiradi”, — dedi Stoltenberg.

NATO bosh kotibi, shuningdek, 4-noyabr, juma kuni Turkiya prezidenti Rajab Toyyib Erdo‘g‘on bilan ikki davlatning alyansga qo‘shilishi masalasini muhokama qilishini aytdi.

Ayni paytda, Mevlut Chavusho‘g‘li Yens Stoltenbergga e’tiroz bildirib, Turkiya va Shvetsiya o‘rtasidagi munosabatlarda o‘sish borligiga qaramay, Xelsinki va Stokgolmning alyansga yaqin orada kirishi haqida gapirish imkonsiz ekanini aytdi. Unga ko‘ra, Finlyandiya va Shvetsiya Anqara qo‘ygan talablarning barchasini hali bajarmagan.

Turkiyaning asosiy shartlari, xususan, Kurdiston ishchilar partiyasi a’zolarini va 2016-yilgi davlat to‘ntarishiga urinishda gumon qilinganlarni Anqaraga ekstraditsiya qilish. Avvalroq Turkiya adliya vaziri Bekir Bozdag Xelsinki va Stokgolmni terrorchilarni ekstraditsiya qilishdan bosh tortishda ayblagan edi. Uning aytishicha, Finlyandiya va Shvetsiya Turkiya tomoni yuborgan ekstraditsiya ro‘yxatidan birorta terrorchini haligacha Anqaraga topshirgani yo‘q.