Janubiy Koreya KXDR sinovlariga javoban uchirgan raketa poligonga qaytib tushdi

Janubiy Koreya va AQSH KXDR uchirgan raketalarga javoban, qo‘shma sinovlar o‘tkazdi va “yer — yer” sinfidagi to‘rtta raketani uchirdi. Bu haqda Yonhap agentligi Janubiy Koreya harbiylariga tayanib xabar berdi.

Janubiy Koreya Shtab boshliqlari birlashgan qo‘mitasi ma’lum qilishicha, Amerika va Janubiy Koreya ikkitadan ATACMS ballistik raketalarini uchirgan, ular nishonlarga borib tekkan. Snaryadlar Yapon dengizi tomonga yo‘naltirilgan. Sinovlar Shimoliy Koreya o‘rta masofali ballistik raketa uchirganidan keyin bir kun o‘tib olib borilgan.

Keyinroq xabar berilishicha, Janubiy Koreya harbiylari KXDRning raketa sinovlariga javoban uchirgan Hyunmoo-2 ballistik raketasi parvozdan keyin ko‘p o‘tmay, bazaga qulagan.

Mamlakat shimoli-sharqidagi Kanvondo provinsiyasi Kannin shahri aholisi yorqin chaqnashni ko‘rib, qattiq gumburlash ovozini eshitgan.

Shundan keyin idora sinovlar olib borilgan bazada raketa qulab tushganini ma’lum qilgan. Hodisada hech kim jabrlanmagan.

Bir kun avval Shimoliy Koreya Xitoy bilan chegaradagi Mupenri poligonidan o‘rta masofali ballistik raketani uchirgandi. Snaryad Yaponiyaning Xokkaydo va Aomori prefekturalari havo hududiga kirdi.

O‘sha kuniyoq AQSH va Janubiy Koreya Sariq dengizdagi orolda F-15K qiruvchi samolyoti ishtirokida qo‘shma mashg‘ulotlar o‘tkazdi. Samolyot ikkita JDAM bombalarini uchirdi. Qiruvchilar ishtirokidagi qo‘shma mashg‘ulotlarni Yaponiya va AQSH ham olib bordi.

Yaponiya Mudofaa vazirligi ma’lumotlariga ko‘ra, KXDR raketasi o‘rta yoki undan ko‘proq masofali bo‘lgan va taxminan 4,6 ming km masofani bosib o‘tgan. Bu KXDR tomonidan uchirilgan raketalar parvozi ichida eng uzog‘idir.

Yaponiya va AQSH Shimoliy Koreyaning sinovlarini qoraladi. Vashington KXDR raketasi yuzasidan yig‘ilish o‘tkazishni so‘rab BMT Xavfsizlik kengashiga murojaat qilmoqchi.

KXDR tomonidan uchirilgan raketa so‘nggi ikki hafta ichidagi beshinchisi bo‘ldi. Oxirgi marta Pxenyan 1-oktabr kuni ikkita kichik masofali ballistik raketa uchirgandi. Ularning ikkalasi ham Yaponiya iqtisodiy zonasidan tashqariga, KXDR sharqiy sohillari yaqiniga qulagan.