“Gazprom” qaroridan so‘ng gaz narxi keskin tushib ketdi

Yevropada birja gaz narxi 21-iyuldan beri ilk bor ming kub metr uchun 1 600 dollardan pastga tushdi. Bu haqda “Kommersant” xabar bermoqda.

Bugun, 5-oktabrda “Gazprom” Rossiya xomashyosini Avstriya orqali Italiyaga yetkazib berishni tikladi.

Savdoning dastlabki daqiqalarida fyuchers shartnomalari har ming kub metr uchun 1 700 dollarni tashkil etgan bo‘lsa, “Gazprom”ning e’lonidan so‘ng narxlar ming kub metr uchun 1 590 dollargacha tushib ketdi.

1-oktabr kuni “Gazprom” Italiyaning Eni kompaniyasiga Avstriya qonunchiligidagi muammolar tufayli mamlakat orqali gaz yetkazib berishning iloji yo‘qligi haqida ma’lum qilgan.

5-oktabr kuni avstriyalik operator ruxsatidan keyin yetkazib berish qayta tiklandi. Italiya gazning 25 foizini Rossiyadan oladi, urush boshlanishidan oldin u mamlakatdan 40 foiz xomashyo olgan.

Avgust oyi oxirida gaz narxi turbinalar ta’mirlanishi munosabati bilan “Gazprom” tomonidan “Shimoliy oqim” gaz quvuri orqali xomashyo yetkazib berish to‘xtatilishi fonida ko‘tarildi.