Tayvan parvozlar va kemalar qatnovi qayta tiklanganini ma’lum qildi
Tayvanning suv va havo hududidan yana foydalanish mumkin bo‘ldi, chunki Xitoyning orol yaqinidagi harbiy mashg‘ulotlar haqidagi bildirishnomalari muddati tugadi, biroq xavfsizlikni saqlash uchun samolyot va kemalar vaqtinchalik xavfli hududlarni aylanib o‘tadi. Bu haqda respublika Transport va aloqa vazirligiga tayanib, “RBK” xabar berdi.
Idora qayd etishicha, bunday hududlar jami yettita bo‘lib, ulardan birida Xitoyning harbiy mashg‘ulotlar to‘g‘risidagi bildirishnomasi muddati ertaga (8-avgust) ertalab tugaydi. Hukumat ushbu hududlarda vaziyatni kuzatishda davom etadi.
Tranzit parvozlari ham qayta tiklanadi, Tayvan aviatsiya hukumati reyslar xavfsizligini ta’minlash uchun o‘z harakatlarini qo‘shni hududlar bilan muvofiqlashtiradi.
Muassasa ma’lumotlariga ko‘ra, Xitoy tomonidan orol yaqinida harbiy mashg‘ulotlar o‘tkazilishi tufayli Tayvan havo hududidan foydalanuvchi xalqaro va tranzit parvozlar xavfli zonalardan qochish uchun o‘z yo‘nalishini o‘zgartirgan yoki bekor qilingan.
Dengiz tashuvlariga kelsak, eng ko‘p cheklovlar Gaosyun, Kilung va Taybey portlariga tegishli bo‘ldi, kemalar o‘z navigatsiya rejalarini o‘zgartirishiga to‘g‘ri kelgan, biroq kemalar qatnoviga Xitoy harbiy manyovrlari katta ta’sir o‘tkazmagan.
Xitoy harbiylari o‘q otish mashqlari bilan dengiz va havo mashg‘ulotlarini 2-avgust, seshanba kuni, AQSH Vakillar palatasi spikeri Nensi Pelosining Tayvanga tashrifiga javoban boshlagan edi.
Pekin orolni o‘z hududining bir qismi deb hisoblaydi, Tayvan hukumati esa orol mustaqil deb turib olgan. Xitoy hukumati Pelosini Tayvanga safari uchun tanqid qilib, uni provokatsiyalarda va “yagona Xitoy” tamoyilini buzishda aybladi.
Xitoy dastlab mashg‘ulotlar 7-avgust kuni yakunlanishini ma’lum qilgandi. 6-avgustda esa Pekin yana bir manyovrlar haqidagi e’lon qildi, ular Sariq dengizning janubiy qismida 15-avgustga qadar davom etadi.
AQSH, Yaponiya va Avstraliya tashqi siyosiy idoralari rahbarlari Xitoyni zudlik bilan Tayvan yaqinidagi harbiy mashg‘ulotlarni to‘xtatishga chaqirib, bu xatti-harakatlar “xalqaro tinchlik va barqarorlikka jiddiy ta’sir o‘tkazayotgani”ni ta’kidladi.
Pentagon qo‘mondonligi keskinlik fonida bir necha marta Xitoy armiyasi qo‘mondonligi bilan bog‘lanishga urindi, biroq ular qo‘ng‘iroqlarga javob bermadi.
Tayvan bosh vaziri Xitoyni “mushaklarini ko‘z-ko‘z qilishni” to‘xtatishga chaqirdi.
Tayvan Mudofaa vazirligi ma’lum qilishicha, 7-avgust kuni ertalab ko‘p sonli Xitoy kemalari, samolyotlari va uchuvchisiz uchar qurilmalari orol yaqinidagi mashg‘ulotlarni davom ettirib, Tayvanga hujumni mashq qilgan.
Harbiy idoradagilar qayd etishicha, voqealarga “tegishli ravishda” javob ko‘rsatish uchun samolyot va kemalar yuborilgan.
Mavzuga doir:
- Xitoy tashqi ishlar vaziri G7 davlatlarining qo‘shma bayonotini “chiqindi qog‘oz” deb atadi
- Xitoyning Tayvan atrofidagi harbiy mashg‘ulotlari global savdoning o‘sishiga tahdid solmoqda
- Oq uy Xitoy elchisiga Tayvandagi vaziyat yuzasidan norozilik bildirdi
