Turkiya tashqi ishlar vaziri Toshkentda Afg‘oniston bo‘yicha o‘tkazilgan konferensiya natijalarini yuqori baholadi
O‘zbekiston tashqi ishlar vaziri vazifasini bajaruvchi Vladimir Norov 2-avgust kuni O‘zbekiston—Ozarbayjon—Turkiya muloqot formatining birinchi yig‘ilishida ishtirok etish uchun kelgan Turkiya tashqi ishlar vaziri Mevlut Chavushog‘lu bilan uchrashdi.
TIV matbuot xizmatining xabar berishicha, muloqot chog‘ida o‘zaro savdo hajmini oshirish, iqtisodiyotning turli tarmoqlarida investitsiya loyihalarini amalga oshirish, madaniy-gumanitar va turizm almashinuvlarini kengaytirish yuzasidan oliy darajada erilishilgan kelishuvlar ijrosiga alohida e’tibor qaratildi.
O‘zbekiston va Turkiyaning xalqaro institutlar doirasidagi hamkorlikni rivojlantirishdan manfaatdorligi ta’kidlandi.
Dunyodagi va mintadagi vaziyat yuzasidan fikr almashildi. Turkiya delegatsiyasi Toshkent shahrida Afg‘oniston bo‘yicha bo‘lib o‘tgan konferensiya natijalarini yuqori baholadi. Afg‘oniston yo‘nalishidagi sa’y-harakatlarni muvofiqlashtirishni davom ettirish va bu mamlakatga gumanitar yordam ko‘rsatishga ikki tomon ham tayyorligi e’tirof etildi.
Mevlut Chavushog‘lu Toshkent shahrida tashqi siyosat, savdo, iqtisodiyot va transport masalalari uchun mas’ul bo‘lgan vazirliklar rahbarlari ishtirokida O‘zbekiston–Ozarbayjon–Turkiya muloqotining birinchi yig‘ilishini o‘tkazish muhim ahamiyatga egaligini ta’kidladi.
Ikki va ko‘p tomonlama darajada rejalashtirilgan tadbirlar, shu jumladan, Samarqanddagi Turkiy davlatlar tashkiloti sammitiga tayyorgarlikning tashkiliy jihatlari ko‘rib chiqildi.
Eslatib o‘tamiz, Toshkentda O‘zbekiston, Turkiya va Ozarbayjon tashqi ishlar, savdo hamda transport vazirlarining uch tomonlama uchrashuv kun tartibidan mintaqalararo hamkorlikni, investitsiya, innovatsiya va transport-kommunukatsiya sohalaridagi aloqalarni yanada rivojlantirish masalalari o‘rin olgan.
