Andijonda 2 kishi kanalizatsiyaga tushib ketdi (foto)
Andijon shahrida 21-iyul kuni 2 fuqaro yerosti quvuriga tushib ketdi. Holat yuzasidan viloyat favqulodda vaziyatlar boshqarmasi axborot xizmati ma’lumot berdi.
Qayd etilishicha, soat 13:45 da viloyat Favqulodda vaziyatlar boshqarmasining navbatchilik qismiga bir guruh fuqarolar tomonidan tezkor chaqiruv kelib tushgan. Shahardagi Y.Otabekov ko‘chasida joylashgan yerosti quvuri (kanalizatsiya)ga 2 nafar fuqaro tushib ketgani aytilgan.
Hodisa yuzasidan boshqarmaning tezkor qutqaruv otryadi xodimlari voqea joyiga borib, maxsus qutqaruv vositalari yordamida har ikki jabrlanuvchini soat 14:00 da chuqurlikdan olib chiqishga muvaffaq bo‘lgan.
Holat sababi o‘rganilganda ular o‘zboshimchalik bilan belgilanmagan tartibda, maxsus kiyim-boshsiz, yerosti suv quvurini ta’mirlash maqsadida tushgani aniqlangan. Ular chuqurlik masofasi 10 metrdan ortiq bo‘lgani uchun havo yetishmasligi oqibatida hushsiz holatga kelib qolgan. Hozirda fuqarolar birinchi yordam ko‘rsatish maqsadida Respublika shoshilinch tez tibbiy yordam markazining Andijon mintaqaviy filialiga yuborilgan.
