O‘zbekistonda anomal issiq ob-havo kuzatilayotgani bois harakat xavfsizligini ta’minlash maqsadida barcha turdagi (yuk va yo‘lovchi) poyezdlarning tezligiga cheklovlar berilmoqda. Bu haqda “O‘ztemiryo‘lyo‘lovchi” xabar qildi.
Shu tufayli bugun, 22-iyul kuni yo‘lovchi poyezdlarning harakat jadvalida, ayniqsa, jo‘nash hamda manziliga yetib borish vaqtlarida o‘zgarish bo‘lmoqda.
“Har bir yo‘lovchini manziliga xavfsiz yetkazib olib borilishini ta’minlash eng muhim vazifadir. Shuni inobatga olib, ‘O‘ztemiryo‘lyo‘lovchi’ AJ rahbariyati yo‘lovchilardan bunday vaziyatni to‘g‘ri tushunishlarini istab, keltirilgan noqulayliklar uchun uzr so‘raydi”, — deyiladi xabarda.
Avvalroq ham O‘zbekistonda anomal issiq ob-havo sabab poyezdlar jadvaliga o‘zgartirish kiritilishi haqida xabar qilingandi. Eslatib o‘tamiz, issiq ob-havo ta’sirida yuz berayotgan bu amaliyot birinchi martasi emas. Iyun oyida ham ikki marta poyezdlar tezligi kamaytirilib, qatnov jadvaliga o‘zgartirish kiritilgan.
Izoh (0)