Nurafshon shahrida Xalq deputatlari Toshkent viloyati kengashining navbatdagi sessiyasi bo‘lib o‘tdi. Bu haqda O‘zA xabar qildi.

Qayd etilishicha, unda Toshkent viloyati hokimi vazifasini bajaruvchi Zoir Mirzayev, viloyat kengashi deputatlari, sektor rahbarlari, viloyat hokimining tegishli o‘rinbosarlari, boshqarma va tashkilot mutasaddilari hamda OAV vakillari qatnashgan.

Majlisda joriy yil 1-yarim yilligida Parkent tumani hokim yordamchilari ishini muvofiqlashtirish va ularga amaliy ko‘mak ko‘rsatish yuzasidan tuman sektor rahbarlarining hisoboti tinglangan. Shu davr mobaynida “Onlayn mahalla” platformasida 1-sektordagi hokim yordamchilari faoliyatining eng muhim samaradorlik ko‘rsatkichlari (KPI) 88,66 ballni tashkil etgan.

Hokim yordamchilari tomonidan 6 oyda “Onlayn mahalla” elektron platformasiga 3-sektordagi mehnatga layoqatli ishlash istagi bo‘lgan 1 ming 274 nafar ishsiz aniqlanib dasturga kiritilgan. Shuningdek, oilaviy tadbirkorlikka yo‘naltirish orqali 316 oilaga jami 7,2 milliard so‘m miqdoridagi kredit mablag‘lari ajratilgan.

Sessiyada Zoir Mirzayev tuman-shaharlarda ko‘rsatkichi past 18 nafar hokim yordamchisini ishdan olish borasida taklif kiritgan.