Андижон шаҳрида 21 июль куни 2 фуқаро ерости қувурига тушиб кетди. Ҳолат юзасидан вилоят фавқулодда вазиятлар бошқармаси ахборот хизмати маълумот берди.
Қайд этилишича, соат 13:45 да вилоят Фавқулодда вазиятлар бошқармасининг навбатчилик қисмига бир гуруҳ фуқаролар томонидан тезкор чақирув келиб тушган. Шаҳардаги Й.Отабеков кўчасида жойлашган ерости қувури (канализация)га 2 нафар фуқаро тушиб кетгани айтилган.
Ҳодиса юзасидан бошқарманинг тезкор қутқарув отряди ходимлари воқеа жойига бориб, махсус қутқарув воситалари ёрдамида ҳар икки жабрланувчини соат 14:00 да чуқурликдан олиб чиқишга муваффақ бўлган.
Ҳолат сабаби ўрганилганда улар ўзбошимчалик билан белгиланмаган тартибда, махсус кийим-бошсиз, ерости сув қувурини таъмирлаш мақсадида тушгани аниқланган. Улар чуқурлик масофаси 10 метрдан ортиқ бўлгани учун ҳаво етишмаслиги оқибатида ҳушсиз ҳолатга келиб қолган. Ҳозирда фуқаролар биринчи ёрдам кўрсатиш мақсадида Республика шошилинч тез тиббий ёрдам марказининг Андижон минтақавий филиалига юборилган.
Изоҳ (0)