Yangiyo‘lda 63 mingta xonadonni bir oylik iste’moliga teng bo‘lgan tabiiy gaz talon-toroj qilindi
2022-yilning 1-iyul kuni O‘zbekiston Davlat xavfsizligi xizmati va Energetika vazirligi huzuridagi “O‘zneftgazinspeksiya” tomonidan navbatdagi nazorat tadbiri o‘tkazildi.
Tadbir davomida “O‘rtaovul oltin g‘isht” MCHJga qarashli Yangiyo‘l tumani, “U.Musayev” MFY hududida joylashgan pishgan g‘isht ishlab chiqarish sexi ko‘zdan kechirilganida, muqaddam 2020-yil sentabr oyida gaz ta’minoti tarmog‘idan uzilib, quvurlari demontaj qilinganligiga qaramasdan gaz hisoblagich o‘rnatmagan holda o‘g‘rincha tabiiy gazdan foydalanib kelinayotganligi aniqlandi.
Hisob-kitoblarga asosan, mazkur korxona tomonidan davlat manfaatlariga yetkazilgan zarar miqdori 12 milliard 586 million 373 ming so‘mni yoki yoz mavsumida 63 mingta xonadonni bir oylik iste’moliga teng bo‘lgan tabiiy gaz talon-taroj qilingani ma’lum bo‘ldi.
