Yaponiya o‘zining eng janubiy oroli yaqinida Rossiya razvedka kemasi paydo bo‘lgani haqida xabar berdi

Rossiya harbiy-dengiz kuchlarining razvedka kemasi 6-iyul kuni Yaponiyaning eng janubiy oroli — Okinotori hududiy suvlariga qisqa muddatga yaqinlashdi, deya xabar bermoqda Kyodo nashri Yaponiya Mudofaa vazirligiga tayanib.

“Rossiya harbiy-dengiz kuchlarining kemasi chorshanba kuni ma’lumot yig‘ib, qisqa muddatga Okinotori marjon atolli oroli hududiy suvlari yaqinidagi dengizga kirdi, Mudofaa vazirligi xabar berdi”, — deyiladi agentlik xabarida.

Uch oroldan iborat ushbu marjon atolli Filippin dengizida, Tokiodan 1,7 ming km uzoqlikda joylashgan.

Shu bilan birga, Kyodo’ning ta’kidlashicha, orol davlatining hududiy suvlariga bevosita tutash zonada suzish xalqaro huquq normalarini buzish emas.

Agentlikning qayd etishicha, Yaponiya Mudofaa vazirligi birinchi marta ushbu rus kemasining Okinotori yaqinida sayohati haqidagi ma’lumotlarni e’lon qildi. Mart oyi oxirida u Tsushima bo‘g‘ozi orqali suzib o‘tib, janubga, Sharqiy Xitoy dengizi tomon yo‘l olgandi, deya qayd etadi Kyodo.

Vazirlik, shuningdek, 5-iyul kuni Rossiyaning uchta kemasidan iborat guruhi Tsushima bo‘g‘ozi orqali Sharqiy Xitoy dengizidan Yaponiya dengiziga qarab o‘tganini ma’lum qildi. Avvalroq, kreyser, fregat va ta’minot kemasidan iborat ushbu guruh Yaponiya atrofidan suzib o‘tib, Sharqiy Xitoy dengizidagi Senkaku orollariga (xitoycha nomi – Diaoyuy) yaqinlashgan.