Boris Jonson Buyuk Britaniya bosh vaziri va Konservativlar partiyasi rahbari lavozimini tark etishga qaror qilganini ma’lum qildi.
Foto: EPA
Jonson yangi rahbar saylangunga qadar partiya va hukumat boshlig‘i sifatida xizmat qilishini aytdi. Avvalroq saylovlar kuzda o‘tkazilishi mumkinligi xabar qilingandi. Jonsonning so‘zlariga ko‘ra, konservatorlarning yangi yetakchisini tanlash tartibi kelasi haftada aniq bo‘ladi.
Siyosatchi nutqi davomida “dunyodagi eng yaxshi ishni tark etganidan qayg‘uda ekanini” va hukumati erishgan yutuqlarni qayd etdi. Shuningdek, tarafdorlariga uni qo‘llab-quvvatlagani uchun minnatdorlik bildirdi.
Bundan tashqari, Jonsonning ishontirib aytishicha, Buyuk Britaniya Ukrainaga “qancha kerak bo‘lsa shuncha” yordam berishda davom etadi. OAV ma’lumotlariga ko‘ra, Jonson xalq bilan gaplashganidan so‘ng Ukraina yetakchisi Vladimir Zelenskiyga qo‘ng‘iroq qilmoqchi.
Jinsiy zo‘ravonlikda ayblangan deputat Kris Pincher hukumat lavozimiga tayinlanganidan keyin Boris Jonson o‘z lavozimini tark etishga majbur bo‘ldi, chunki Jonson Pincherga nisbatan qo‘yilgan ayblovlardan xabardor bo‘la turib, uning lavozimga tayinlanishiga imzo chekkan.
Iyul oyi boshidan beri 50 ga yaqin odam — vazirlar va parlament kotiblari, Vazirlar Mahkamasi ishida qatnashganlar norozilik sifatida Jonson hukumatini tark etdi.
Izoh (0)