Temur Kapadze: “Yigitlar zo‘r o‘ynadi, ular bilan faxrlanaman”
Futbol bo‘yicha O‘zbekiston U-23 terma jamoasi bosh murabbiyi Temur Kapadze Osiyo Kubogi finali doirasida Saudiya Arabistoniga qarshi kechgan o‘yindan (0:2) keyin o‘z fikrlari bilan o‘rtoqlashdi.
O‘yin haqidaBugun g‘alaba qozonib, butun xalqimizni xursand qilmoqchi edik. Biroq bu ishni uddalay olmadik. Buning uchun uzr so‘rayman. Nasib emas ekan. Barcha muxlislarga rahmat aytamiz. Keyingi turnirlarda yaxshiroq natija qayd etishga harakat qilamiz.
Bo‘riyevning o‘yin haqida
U o‘yin davomida yaxshi harakat qildi. Bugun o‘yin qiyin bo‘ldi. Afsuski, mag‘lubiyatga uchradik. Bolalarga rahmat aytaman. Bu bizga katta maktab bo‘ldi, bu mag‘lubiyatdan keyin yanada kuchliroq bo‘lamiz deb umid qilaman.
Charchoq borasida
Albatta, bu turnirda hamma jamoada charchoq bor, ayniqsa, finalchilarda. Chunki uzoq yo‘l bosib o‘tiladi. Bugun bolalar borini berib harakat qildi.
Bu jamoani tashkil qilganimizdan asosiy maqsad – Olimpiada. Biz bu turnirda yoshroq futbolchilar bilan ishtirok etgan bo‘lsak ham, yaxshi natija qayd eta oldik deb o‘ylayman. Bu musobaqada futbolchilarni ham ruhan, ham jismonan ko‘rib oldik. Bolalar zo‘r o‘ynadi, ular bilan faxrlanaman.
Bir o‘yinda qaysidir futbolchi yaxshiroq o‘ynadi, qaysidir-da esa boshqasi. Aytishim kerak, hali yanada o‘sishimiz kerak.
Futbol shunday narsa – uzoq dam ololmaysiz. O‘yin tugagandan keyin u tarixga kiradi. Siz keyingi o‘yinga tayyorgarlik ko‘rishingiz kerak. To‘g‘ri, futbolchilarimda ruhiy va jismoniy tomonlama biroz toliqish bor. Lekin hayot davom etadi.
Temur Kapadze, O‘zbekiston U-23 bosh murabbiyi
