НАТО мудофаа вазирларининг Брюсселдаги йиғилишида Киевга қурол-яроғ, жумладан, узоқ масофага ўт очувчи тизимлар етказиб берилиши ҳақида эълон қилинади. Альянс келажакда Украина армиясини совет қуролларидан НАТО қуролларига ўтказиш дастурини қабул қилиши мумкин.
«Украина мудофаа вазири Алексий Резников чоршанба куни кечқурун Брюсселда бўлиб ўтадиган НАТО мудофаа вазирлари йиғилишида нутқ сўзлайди», — деди НАТО бош котиби Йенс Столтенберг мазкур йиғилишдан олдинги матбуот анжуманида. «Украина мудофаа вазири Киевнинг қандай қуролларга бўлган эҳтиёжини зудлик билан таъминлаш кераклиги ҳақида хабар беради», — дея қўшимча қилди НАТО бош котиби.
Шунингдек, унинг сўзларига кўра, НАТО иттифоқчилари Украинани қўллаб-қувватлаш бўйича янги чора-тадбирларни эълон қилади. «Иттифоқчилар Украинани ҳарбий техника, жумладан, оғир қуроллар ва узоқ масофага ўт очувчи тизимлар билан таъминлашни давом эттириш тарафдори», — дейди у.
Аввалроқ Украина мудофаа вазири ўринбосари Ханна Маляр Киев зарур қуролларнинг атиги 10 фоизини олганини маълум қилганди. Столтенберг бу баёнотга изоҳ берар экан: «Биз бугун Украина мудофаа вазири билан учрашамиз ва вазиятни қандай яхшилашимиз мумкинлигини муҳокама қиламиз. Иттифоқчилар сўнгги ойларда Украинага мисли кўрилмаган ёрдам кўрсатди», — деди.
Ой охирида НАТО давлат раҳбарлари саммитида Украинани қўллаб-қувватлаш бўйича яна бир кенг кўламли дастур эълон қилиниши мумкин. «Умид қиламанки, саммитда НАТОга аъзо йирик давлатлар Украинага узоқ муддатда совет давридаги қуроллардан замонавий НАТО қуролларига ўтиш ва ўзаро ҳамкорликни яхшилашга кўмак берадиган ёрдам пакетини маъқуллайди», — дейди Столтенберг.
Унинг эслатишича, НАТО давлатлари аллақачон Украинага миллиардлаб доллар кўмак, жумладан, ҳарбий ёрдам берган.
Изоҳ (0)