Surxondaryoda yashash xonadonlarida kannabis va ko‘knori yetishtirib kelgan shaxslar aniqlandi

Surxondaryo viloyatining Termiz shahri va Boysun tumanida o‘tkazilgan tezkor tadbirlar davomida giyohvandlik vositalarini noqonuniy yetishtirish bilan shug‘ullanib kelgan shaxslar faoliyatiga chek qo‘yildi. Bu haqda viloyat IIB axborot xizmati xabar berdi.

Ma’lum qilinishicha, “Qoradori-2022” tezkor profilaktik tadbiri davomida Termiz shahar IIB jinoyat qidiruv guruhi xodimlari tomonidan olingan tezkor ma’lumotga asosan shaharning “Yulduz” mahallasida yashovchi T.I.ning yashash xonadoni va yordamchi xo‘jaligi ko‘zdan kechirilgan.

Natijada T.I. tomorqasida 102 tub kannabis o‘simligini ekib, parvarishlab kelayotgani hamda alohida yulib olingan taxminan vazni 1 kilogramm marixuana giyohvandlik moddasi ham saqlanayotgani aniqlanib, xolislar ishtirokida tegishli tartibda hujjatlashtirib olingan.

Holat yuzasidan I.T.ga nisbatan Termiz shahar IIB huzuridagi Tergov bo‘limi tomonidan dastlabki tergov harakatlari olib borilmoqda.

Shuningdek, Boysun tumanida IIB xodimlari tomonidan olib borilgan tezkor-qidiruv tadbirlari davomida tumanning “Ko‘chkak” mahallasida yashovchi B.Z. (ayol)ning yashash uyi va yordamchi xo‘jaligi ko‘zdan kechirilganda, tomorqasida 173 tup ko‘knori o‘simligini ekib, parvarishlab kelayotgani aniqlangan.

Taqiqlangan ekinni bila turib o‘z xonadonida yetishtirgan fuqaroga nisbatan tergovga qadar surishtiruv harakatlari olib borilmoqda. Topilgan o‘simlik poyalari esa o‘sha yerning o‘zida tegishli tartibda rasmiylashtirib olingan.

Avvalroq Samarqandda 2 kilo opiyni 30 ming dollarga sotishga uringan Tojikiston fuqarosi qo‘lga olingani, Surxondaryoda 20 kilo opiyni 140 ming dollarga sotishga uringan shaxs ushlangani, O‘zbekistonda Tojikistondan keltirgan giyohvand moddalarni sotish bilan shug‘ullangan shaxslar qo‘lga olingani to‘g‘risida xabar berilgandi.