Сурхондарё вилоятининг Термиз шаҳри ва Бойсун туманида ўтказилган тезкор тадбирлар давомида гиёҳвандлик воситаларини ноқонуний етиштириш билан шуғулланиб келган шахслар фаолиятига чек қўйилди. Бу ҳақда вилоят ИИБ ахборот хизмати хабар берди.
Маълум қилинишича, «Қорадори-2022» тезкор профилактик тадбири давомида Термиз шаҳар ИИБ жиноят қидирув гуруҳи ходимлари томонидан олинган тезкор маълумотга асосан шаҳарнинг «Юлдуз» маҳалласида яшовчи Т.И.нинг яшаш хонадони ва ёрдамчи хўжалиги кўздан кечирилган.
Натижада Т.И. томорқасида 102 туб каннабис ўсимлигини экиб, парваришлаб келаётгани ҳамда алоҳида юлиб олинган тахминан вазни 1 килограмм марихуана гиёҳвандлик моддаси ҳам сақланаётгани аниқланиб, холислар иштирокида тегишли тартибда ҳужжатлаштириб олинган.
Ҳолат юзасидан И.Т.га нисбатан Термиз шаҳар ИИБ ҳузуридаги Тергов бўлими томонидан дастлабки тергов ҳаракатлари олиб борилмоқда.
Шунингдек, Бойсун туманида ИИБ ходимлари томонидан олиб борилган тезкор-қидирув тадбирлари давомида туманнинг «Кўчкак» маҳалласида яшовчи Б.З. (аёл)нинг яшаш уйи ва ёрдамчи хўжалиги кўздан кечирилганда, томорқасида 173 туп кўкнори ўсимлигини экиб, парваришлаб келаётгани аниқланган.
Тақиқланган экинни била туриб ўз хонадонида етиштирган фуқарога нисбатан терговга қадар суриштирув ҳаракатлари олиб борилмоқда. Топилган ўсимлик поялари эса ўша ернинг ўзида тегишли тартибда расмийлаштириб олинган.
Аввалроқ Самарқандда 2 кило опийни 30 минг долларга сотишга уринган Тожикистон фуқароси қўлга олингани, Сурхондарёда 20 кило опийни 140 минг долларга сотишга уринган шахс ушлангани, Ўзбекистонда Тожикистондан келтирган гиёҳванд моддаларни сотиш билан шуғулланган шахслар қўлга олингани тўғрисида хабар берилганди.
Изоҳ (0)